Rev.Dr Zairema thu leh hla zirho a ni
Pachhunga Univesity College (PUC)-a Mizo department leh Zairema Memorial Society (ZMS) chuan November 1-2 chhung khan Rev.Dr Zairema thuziak zir chianna, ‘National seminar on Reconnecting Rev.Dr Zairema: An indepth study of his theological and prose writings’ tih an buatsaih.
Seminar hi November 1 khan Synod senior executive secretary Lalramliana Pachuau-in a hawng a, nimin khan Baptist kohhrana executive secretary Rev.Dr K Lalrinthanga'n a hmanpui thung.
Rev. Lalramliana Pachuau chuan, Rev.Dr Zairema chu Mizo hnam tana mi ṭangkai, hriatreng hlawh tur leh mi ropui a nih thu a sawi a; a chanchin leh a kutchhuak zi rchian a ni chu theology leh secular lamah thila ṭangkai tak tur a nih thu leh, Rev.Dr Zairema chu a hun lai hnam mil ang zela Pathian thu kalpui thiam a nih thu a sawi a ni.
PUC principal Dr Tawnenga chuan, Rev.Dr Zairema chu Mizo zingah a nung reng dawn tih sawiin, "A a kutchhuak pawh zir chian a, degree ropui tak tak lak nan ṭhangtharte'n an la hman zel a beiseiawm a ni," a ti.
Seminar-ah hian mi 50 chuangin paper an present a, chu'ng zinga mi 14 chu Pathian thu (theology) lam zir chhuak an ni. Paper present-tu zingah hian United Theological College (Bangalore), Serampore College (University), Eastern Theological College (Jorhat), Aizawl Theological College, Academy of Integrated Christian Studies, Jawaharlal Nehru University, MZU bakah, Mizoram chhung leh páwn college hrang hranga mithiamte an tel a ni.
PUC Mizo department-in national seminar an buatsaiha paper hrang hrang an dahkhawmna lehkhabu, ‘Nuchhungi leh Naupang Literature (Understanding Children’s Literature of Nuchhungi Renthlei : Approaches and Systems) chu Rev. Lalramliana Pachuau-in a tlangzarh bawk.