ZPM ṭhan chak chhanah R Lalzirliana ngai

Zoram Peoples' Move­ment (ZPM) senior vice chairman F Rodingliana chuan nimin khan an pawl pisaa inkhawmah thu sawiin, ZPM ṭhan chak chhan hi Pu R Lalzirliana a nih thu leh amah chu ZPM tan 'Golden Boy' a nih thu a sawi.

F Rodingliana chuan, "Tun hnaia ZPM ṭhan chakna em em chhan hi Pu Zira vang a ni a, amah hi ZPM tan chuan kan ‘Golden Boy’ a ni. Zoram mipui hian Congress hi a tluchhe mek a ni tih an hai lo a, Congress hi awmna tlak a ni tawh lo tih a taka tilangtu a nih avangin miin ZPM an rawn zawm phah a ni,” a ti.

MNF chu mipuiin cor­ruption nen an thin­lungah an la hmehbel tlat tih sawiin F Rodingliana chuan, "Thu belhchian dâwl lo sawi an la chíng tlat a, tunah pawh an President berin, 'Kan sorkar chuan vai buhfai kan ei lo ang' a ti leh ngawt a; hei hi thil theih a ni lo. A chhan chu sorkar policy a nih avangin a kalsan ngawt theih loh a ni," a ti a; Congress party pawh an piangthar zing lutuk a, tun ṭum erawh chuan an tlai deuh niin a sawi.

F Rodingliana chuan, ZPM-in ram hlui zia angin mi thar kan lâwm lut ve dur dur lo mah se, ni tin ZPM-ah mi thar an lut reng niin a sawi a, "Memberhip fee kan lak ve loh avang hian kan khingpuite hian tlem anga min lantir an tum ṭãlh a, hei hi sawifiah deuh a ngai a ni,” tiin ZPM dinhmun a sawifiah.

ZPM Sr. Vice Chair­man sawi danin, ZPM-a thawhhona a awm tirah ZPM-a tel ZNP-in unit 817 leh block 62 vel an nei a, MPC-in unit 192 leh block panga an nei. Chumi hnuah, thla hnih - September leh October chhung ringawtin ZPM local steering committee 125 ding thar a, mi 20,000 velin an pung a ni.

F Rodingliana chuan, ZPM an sorkar chuan Mizoram sawhthing chu inter-state boundary an pelhpui dawn tih sawiin, "Tuna kan sorkar hrawn tawh leh hrawn mekte hian Bagha pêlin an thawn thiam tlat lo, a permit pawh an pe ngam lo a, pe theitu pawh an awm lo. Hei hian kut hnathawk­tute a ngaihsak lohzia a tihchiang hle a ni," a ti.