Mi zawng zawng an corrupt lo - Chief Secretary
Vigilance Awareness Rally 2018 hman mek puala essay inziahsiak buatsaiha ti ṭhate hnenah nimin khan SAD conference hall-ah lawmman sem a ni a, khuallian chief secretary Arvind Ray chuan mi zawng zawng an corrupt loh thu a sawi.
Chief Secretary chuan, eirukna hlawhtling taka do tur chuan mihring ngaihdan leh rilru puthmang - dik leh dik lo, ṭha leh ṭha lo thlir dan kaihruai theitu chhungkua, khawtlang leh kohhran an pawimawh thu leh an mawhphurhna a sàn thu a sawi a, "Corruption ziaráng chu khawvel hmun hrang hrangah hmuh turin a awm tih chu phat theih rual ni lo mah se, mi zawng zawng an corrupt lo. Chutih rual chuan, kan hnathawhna hmunah emaw, khawi hmunah pawh ni se, mi rinawm taka a nun tlat chuan eirukna kan buaipui hi a nêp zel thei dawn a ni," a ti.
Anti Corruption Bureau director Mukesh Kumar Meena pawhin thu sawiin, "Corruption do turin mipui an ṭanrual a pawimawh hmasa a, rilru puthmang thlak danglam a ngai," a ti a; corrupt duhna emaw pawi tih lohna rilru pu lo tura inzirtir a ṭul thu a sawi.
Essay inziahsiak thupui atan hian 'Ka hmathlir - Eiruk awm lo Mizoram' tih a ni a; pakhatna Malsawmtluanga, Govt. Complex-in Rs. 30,000, pahnihna C.Lalchhanhima, Bawngkawn South-in Rs. 20,000 leh pathuma Vanlalmalsawma, Ramrikawn-in Rs. 10,000 an dawng a ni.