Pawl pathumin min beih rawn - Zorama

MNF president Zoramthanga chuan, MNF party chu pawl dang pathum - Congress, Zoram peoples' Movement leh BJP-te'n an beih rawn tawh niin a sawi a; chutiang karah chuan an party mite chu dâwta mi bei lo turin a chah.

Zoramthanga hian nimin khan Mizo Hnam Rûna MNF chhúng inkhawmah thu sawiin, MNF chu sorkar tura a lan avangin Congress, ZPM leh BJP-ten an beih rawn vek niin a sawi a, "BJP president Amit Shah te, Mizoram inthlan viltu BJP hotu Himanta Biwas Sharma ngei pawhin MNF leh BJP thawhho loh thu hi chiang takin chanchinbu mite hmaah an sawi. MNF High Command ngei pawhin ‘Party dang tumah thawhpui loh’ kan rel bawk. Chuti chung chuan, kawng dang an neih tawh loh avangin ‘BJP nena thawk dunah’ Congress hian min puh lui ṭãlh a ni," a ti.

MNF President chuan, “Thu hlui leh dâwt chi hrang hrang, a tûk maia dâwt a nih fiah leh nghal mai turah pawh dâwtin min bei ngar ngar duh a, hetiang chi hian MNF chuan tumah beih ve loh tur, tiin MNF mipui ka chah a ni... Thutiam dawráwm pui pui tiam a, sorkar tuma hmalak hi kan duh ve lo. Mipuite’n min lo thlir rawh u, SEDP kaltlangin nuai thumin mipuite kan ṭanpui dawn a," a ti a; an hmalakna azirin nuai thum aia tam pawh ṭanpuina pek a ni dawn niin a sawi.

SSA zirtirtute hlauthawng tak leh dinhmun chhe takah dingin, hlawh lak theih loh an neih fo thu sawiin Zoramthanga chuan, "MNF kan sorkar a nih chuan SSA zirtirtute hian kan sorkar lai ang khan regular takin hlawh an la leh dawn a, a tahtawlin SSA zirtirtute hi kan regularise dawn tih ka sawi duh. An welfare chungchang kan ngaihtuahsak dawn bawk. SSA hi kan hrin a ni a, zirtirtute hmakhua hi kan ngaihtuah dawn a ni," a ti.