CEO-in a hêk vangin Home secretary Lalnunmawia Chuaungo sawn chhuak

Mizoram NGO Coordination Committee chuan, Mizoram Chief Electoral Officer (CEO) SB Sha­shank chu inthlan inbuatsaih­naah buaina cho chhuah tumah leh, chumi denchhena Bru raltlante an camp Tripura-a vote thlaktir tumah a puh a, tun thla tawpa Mizo­ram assembly inthlan turah mawh phurtu hotu bera an rin ngam loh thu an au chhuahpui a, thlak nghal turin thuneitute an phut.

NGO Coordination Committee chuan CEO SB Shashank chu vawiin, Thawhṭanni ni tlak hma ngeia Mizoram chhuahsan turin an phût a, Mizoram a chhuahsan loh chuan a pisa kai tur dan an tum.

NGO chairman Vanlalruata hnen aṭanga Vanglainiin thu a dawn danin, CEO Sheshank chuan a thil tum dodaltua a ngaih vangin Home leh Finance department enkawltu principal secretary Lalnunmawia Chuaungo chu Election Commission of India-ah a hek a, ECI rawt angin Lalnunmawia chu Mizoram atangin November ni 2 khan sawn chhuah nghal a ni.

ECI under secretary Santosh Kumar Dubey-a'n Mizoram Chief Secretary hnena lehkha a thawnah chuan ECI-in Mizoramah inthlanna felfai leh zalen a awm theihna atana hma a lakna tibuai thei thil thleng awm angin a tarlang a; Bru camp-a electoral roll revision dodaltuah te, lehkha pawimawhte August 23, 2018 zana CEO Office atanga rûkbo a nih thuah leh Mamit DEO (DC) chu YMA hmalaknaa dodal a nih thuahte Lalnunmawia Chuaungo chu mawhphurah a rawn puh a ni.

Hengte avang hian Lalnunmawia chu Mizo­ram aṭanga sawn chhuah tur a nih thu ECI lehkha chuan a tarlang a, Mizoram inthlanpui leh a kaihhnawih thil thawh zawh hun, December 13, 2018 hma chuan Mizoram inthlan kaihhnawih hnaah inhnamhnawih lo tura tih a ni.

Tarlan tawh angin, November 2-a Joint NGO ṭhukhawm a, SB Shashank-a'n inthlan a buatsaih dan chu ṭha an ti lo a, inthlanna him leh felfai tak nei turin a kalpui loah an ngai a, inthlan kaihhnawih buaipui zel tlaka an ngai loh avangin November 5 ni tlak hma ngeiin Mizoram chhuahsan turin an phût.

Central YMA Executive Com­mittee chu November 3, Inrinni khan ṭhukhawmin,Joint NGO-in SB Shashank laka an phut chu ṭha an ti a, a hlawhtlin theihna atan November ni 6-ah 'Hnam chhan hnatlang' neih an rawt.

CYMA chuan Inrinni zan khan Vanapa Hall-ah Aizawl khawpuia YMA branch tin hruaitu mi 10 ṭheuh an ko khawm a; November 6, Thawhlehnia 'nam chhan hnatlangah thawk chhuak turin an ngen a ni.

CYMA president Vanlalruata chuan, ECI hotute Aizawla an lo kal ṭumin Joint NGO hruaitute nen Bru-te vote thlak dan turah an ngaihdan a inpersan tih a sawi a, Home Ministry, Tripura state sorkar, Mizoram sorkar leh Bru aiawhten kumin July ni 3-a an remtih tlan angin Bru-te chu September ni 30 ral hmain Mizorama an khua ṭheuhah hawin, roll-a an chuanna polling booth-ah vote an thlak tur a ni tih chu ding tlang tur an ngaih thu Central YMA chuan a thlen nawn a, ECI chu an lo intiam tawhna kaltlangpui turin an ngen tih a sawi.

Mizoram chhung, Tripura ramri bulah special polling booth siama vote thlaktir an tum nia an hriat thu leh, chu pawh chu an duh loh thu YMA president chuan a sawi bawk.

ZPM Tangrual Pawl chuan thuchhuah siamin, Mizoram CEO SB Shashank chu a hna thawh danah Mizoram inthlanpui buaipuitu lu ber atan rin ngam harsa a tih thu tarlangin a dem a, a rang thei anga dahsawn tur leh, a aiawh rawn ruat thuai turin sorkar laipui a ngen nghal.

July 3-a four corner meeting (Central sorkar, Tripura, Mizoram leh Bru displaced forum) thutlukna zawm duh loa relief camp-a awm luite chu vote thlaktir dan kawng dap lui lo turin Election Commission leh Mizoram CEO office chu a phut a, Mizoram Joint NGO chu an thlawp tlat tih tarlangin, tharum thawh lovin, lungrual tak, huaisen tak leh fimkhur taka hma la turin a chah nghal.

ECI-in a lehkhaa a tarlante
• Bru camp-a electoral roll revision lehkha pawi­mawhte Aughust 23, 2018 zanah rûkbo a ni.
• Mamit DEO (DC) chu YMA hmalakna avangin dodal a ni.
• Mizoram sorkarin Tripura camp-a cheng Bru-te tana identity slip a pek chu vote nei thei an nihna tichiangtu atana hman tumna dodalin, Bru lak letna atan chauha hman tura tih a nih thu Mizoram Home department-in a ti.
• Identity slip chungchang chu October 17, 2018-a ECI hotute nen Aizawla an meeting-naah zawhfiah a ni a, Lalnunmawia Chuaungo-in chhanna mumal a pe thei lo.
• Mizoram CEO-in Central Armed Police Force lak luh a rawtna Lalnunmawia Chuaungo-in a ṭul a tih loh thu a hrilh.
• Home Secretary Lalnunmawia'n CEO hnenah October 31, 2018-ah lehkha a ziak a; Tripura camp-a Mizoram Bru-te tana vote an thlakna tura special arrangement siam chu Mizoram sorkar duh dan a nih loh thu leh Mizorama an awmna polling station-a vote thlak chu sorkar duh dan a nih thu te, special arrangement siamin boruak ṭha lo zawk a thlen theih thute a ziak.

CEO-in Mizoram sorkar a hêkna
• Electoral roll-a Bru-te thunna form bo chhuina kawngah state sorkarin hma a la chak lo.
• Electoral roll revision tihnaah repatriation atana Home-in indentification a siam hman phal a ni lo tih Home-in DC tin a hriattir. Hei hian Bru-te roll-a thun belh lo tura sorkarin a ruka hma a lak dan a entir.
• Inthlan buaipui tura central arm police force CEO-in a lo koh luhah Home-in clarification la hmasa loa CEO-in a tih avangin, Home-in inráwn tlanga tih nise a tih chu, inthlan chungchangah sorkar a inrawlh tiin ECI ah a thlen.
• Point hrang hrangah hian Home secretary Lalnunmawia Chuaungo chu a mawhphurtu vek a ni.