KHAWTHLIR

Thisen pe
November 3, Inrinni khan Dinthar Branch KṬP chuan an din champha vawi 42-na pualin an Kohran Hall-ah Synod Hospital tan thisen unit 34 an pe a, a petute mipa 31 leh hmeichhia pathum an ni. Venghnuai Branch KṬP-in an Kohhran Hall-ah Aizawl Civil Hospital-ah thisen unit 19 pein, a petute mipa 17 leh hmeichhia pahnih an ni a; Chhiahtlang Students' Union-in unit 16, Bungtlang South Welfare, Aizawlin unit 8 leh Tlau Group-in unit 7 an pe bawk.

Candidate tifel
MPCC chuan candidate tur an la tihfel lohna bial pahnih, Siaha district-a Palak leh Lawngtlai district-a Tuichawng biala an candidate tur chu tun hnai khan an tifel. Palak bialah KT Rokhaw leh Tuichawng bialah Kali Kumar Tongchangya an ding dawn.

Pump-ah kângmei chhuak
Treasury Square, Aizawla MIZOFED petrol pump bula dan lo (black)-a petrol zawrhnaah nimin chhûn khan kângmei a chhuak a, a kan nasat lutuk hmain ṭhelh mih a ni. Helai hmunah hian ualau takin dan loin petrol hi an zuar reng a ni.

Inthlan atan Nomination file
November 28, 2018-a Mizoram inthlanpui neih tura candidate eng emaw zat chuan November 3, Inrinni khan an bialtu returning officer-te hnenah nomination paper an thehlut. Inrinnia nomination file-tu zingah Ṭawi biala ding tur BJP president Prof. JV Hluna leh INC ticket-a ṭum li MLA atana thlan tlin MNF candidate tur R Lalzirliana-te pawh an tel.