EVM tihchingpen vangin 2008 & 2013 inthlanah kan chak lo - Zorama

MNF president Zoramthanga chuan, kum 2008 leh 2013 Mizoram MLA inthlanah electronic voting machine (EVM) tihchingpen a nih avangin amah chu MLA inthlanah a tla a, MNF party pawh an chak lo niin a sawi.

November 2, Zirtawpni zana ZONET Cable TV-a an kawmnaah Zoramthanga chuan EVM tihchingpen vanga chak lo an nih thu a sawi a, "Kum 2008 leh 2013 inthlana min hnehna kha rigging a nih vang a ni. Sorkar kum 10 kan lal hnuah kan han inthlang a, undivided Aizawl district-ah pakhat, Lungleiah pakhat, Chhimtuipuiah pakhat min zuah a, pathum chiah min zuah a ni. Chuvangin, ECIL-in an EVM an siam kha tihchingpen theihin an siam a, a chhan chu a titute ngeiin min hrilh ka hria a ni," a ti.

MNF President chuan, kum 2008 leh 2013 MLA inthlan chu goal véngtu tel loa penalty chhuih ang a nih thu sawiin, "An duh zah zah an chhuih goal a ni. Champhaiah khian kum 21 a záwnin ka tling tawh a, tumahin min la hneh lo. Kum 10 Chief Minister ka niha mipui an lâwm vanglai takin kan inthlang a, Pu TT Zothansanga mi thar a lo kal a, a campaigner-te pawhin CM meuh khin chu a harsat thu leh tling lo tura an inrin thu an sawi niin ka hria," a ti a; chuti chunga vote 1,256-a a chak lo chu mak a tih thu a sawi.

Inthlan zawh chawlhkar khat hnu vela vote an chhiar dawnin TT Zothansangate chu Aizawl aṭangin vote 1,000 chuanga a chak tur thu an hrilh tih sawiin Zoramthanga chuan, "Chuvangin, Thawhṭannia vote chhiar tur khan Chawlhni tlaiah a lawmna tur vawk an talh lâwk ngam a ni. Vote 1,256 khan engti kawng mahin ka tla thei lo reng reng," a ti.

Zoramthanga chuan, kum 2013 inthlanah chuan East Tupui bialah INC candidate T Sangkunga chu vote 300 vela hneh tura a inchhût thu sawiin, "Pu Sangkunga campaigner-te pawhin ka hriat dan chuan chumi ang vel chuan chak turah min ngai a, chuvangin an down viau. Amaherawhchu, an chhukthla a, Chief Minister bangla aṭangin an duh duh dictate a, Pu T Sangkunga chuan vote 800-in a chak tur thu a sawi a, vote hnih chiahin a sawi dik lo," a ti a; kum 2008 leh 2013 inthlan chu party len dan tehna atan hman tlak a ni lo niin a sawi.

MNF President chuan, kum 2008 leh 2013-a EVM tihchingpen avangin High Court-ah an kal thu sawiin, "High Court-in kan EVM hman an awih ta lo a, Bombay aṭangin BHEL siam a thar an rawn la chho a ni. A hnu thla ngaah Congress vanglai takin MP kan inthlang a, MLA inthlana darkar 15 vel vote chhiarna atan hun hman a nih laiin, MP inthlanah chuan EVM tihchingpen thei loh kan hmang a, chawhma chanve chhungin an chhiar zo leh vek. Prove dang hi a ngai lo reng reng," a ti.

Kumin 2018-a MLA inthlana hman tur EVM-te chu a rin leh rin loh zawhna chu Zoramthanga chuan, "Company-in manufacturing stage-a rig theih tura an duan a ni lo," tiin a a rin tawh thu a sawi.