MLA S Laldingliana vui liam a ni

Mizoram MLA ni lai, S Laldingliana (64), Chanmari, Lunglei chu November 3, Inrinni zing dar 6:45 khan chaw dáwt cancer vangin a thi a, Inrinni vek khan vui nghal a ni.

Lunglei South Assembly constituency bialtu MLA S Laldingliana s/o S Lalchungnunga hi June 21, 1954-ah Theiriatah a piang a, Delhi University-ah MA a zawh hnuah kum 1982 aṭangin Lunglei College-ah lecturer hna a thawk. Lunglei Chanmari Veng YMA hruaitu hlun a ni a, kum 2006-ah YMA Sub-Hqrs, Lunglei president niin, kum 2008-ah thlan nawn a ni a; Lunglei College-a a hna leh YMA Sub-Hqrs.-a a chanvo chu kalsanin, kum 2008 Mizoram Assembly inthlannaah Congress party ticket-in Lunglei South aṭangin MLA atan thlantlin a ni.

Mizoram sorkarah parliamentary secretary a nih hnuah kum 2013-a Mizoram inthlanpuiah Lunglei South aṭang bawkin thlan tlin leh a ni a; Lunglei High Power Committee vice chairman-ah dah niin, a thih thlengin a chelh zui ta a ni.

S Laldingliana hian a nupui Lilypari Sailo, an fapa pakhat leh an tu pathum a kalsan. Inrinni chawhnu khan pastor ZD Rodingliana'n a vui a ni.

Congress party leh MNF party-te chuan Inrinni khan thuchhuah siamin S Laldingliana thi chu pawi an tih thu leh an sùn thu an tarlang. An thuchhuah hi amah vuina inkhawmah chhiar chhuah ve ve a ni.