Dan angin Saitual district kalpui a ni ang - Rosiamngheta

Mizoram Assembly constituency pakuana - Ṭawi biala Congress party candidate Rosiamngheta chuan, Congress-in sorkarna an chang leh a nih chuan kum 2008-a Saitual district puan tawh chu dan anga kalpui a nih tur thu a sawi a; kum 20 chhung bialtu MLA R Lalzirliana'n Ṭawi bial hmasawnna tur sorkarah a thlen ngai lo niin a sawi bawk.

Rosiamngheta hian MPCC Media department hotute nen November 3, Inrinni khan Aizawl Press Club-ah thuthar thehdarhtute an kâwm a; kumina inthlana Congress sorkar zui leh ta se, Saitual district puan tawh tihpuitlin an tum leh tum loh zawhna chhangin Rosiamngheta chuan, "Dan hnuaiah dan angin district hi kalpui a ni ang. Tunah pawh a fûkê Treasury sorkarin a dah tawh a ni," a ti.

Rosiamngheta chuan, Ṭawi bialtu ni ṭhin R Lalzirliana'n Saitual district tihpuitlin a nih theih nan sorkarah a thlen ngai lo niin a sawi a; Saitual District Implementation Demand Committee (SDIDC) hruaitute chu MNF party an àwn nia sawiin, "SDIDC hi MNF instrument (hmanrua) pakhat niin a lang. SDIDC hmalaknaah Saitual mipuite an lungrual lo," a ti.

Ṭawi biala INC Candidate chuan, ṭawi bial hmasawnna turin a bialtu MLA leh minister R Lalzirliana'n sorkarah a thlen ngai lo nia sawiin, kawng chhia tam tak chu a minister laiin a tlawh lo niin a sawi.

MPCC Media department press statement chuan, R Lalzirliana chu party kalha a chêt avangin Congress aṭangin hnawhchhuah a nih thu tarlangin, "MLA inthlannaah kan official candidate atan Pu Rosiamngheta ruat a ni. Pathian leh mipui zarah MLA-a a tlin ngei kan ring a, he bial hian Congress MLA an neih ngeina turin ṭan kan la mek a, hma kan sawn zel a ni," a ti.

Saitual district demand tihhlawhtlin tiamin R Lalzirliana'n MNF ticket-in Ṭawi bialah MLA a chuh leh mek tih sawiin MPCC chuan, "Lemchang mai leh MLA tling zâwn rei nih tum mai a ni tih an hmu fiah hle a ni," a ti bawk.

Zawhna chhangin Rosiamngheta chuan Ṭawi bial tana hna thawh a tumte a sawi a; Saitual Water Supply tihpuitlina tum thu leh, Thingsul leh Seling tui lakna siam a tum thu te, Maite kawng siamṭhat a tum thu te, Saitual khaw chhung kawng siam a tum thu te, Thingsulthliah Higher Secondary School regularise a nih theih nan hmalak a tum thu te, thlai thar dahṭhatna tur cold storage dah a tum thu te, sawhthing tihrona khawl dah a tum thute a sawi.