IMR leh MMR hniamah Mizoram 2-na

Congress party chuan thuchhuah siamin, India rama state 29 leh union territory pasarih zingah nausen thi zat tehna, Infant Mortality Rate (IMR) leh nau chunga nu thi zat tehna, Maternal Mortality Rate (MMR)-ah Mizoram chu a hniam lamah pahnihna a nih thu an tarlang a; lawmawm an tih thu sawiin, hriselna dah pawimawhtu sorkar hre reng turin mipui an ngen.

MPCC chuan, ram changkan leh changkan lohna tehna pakhat chu nausèn leh naupang kum khat hnuai lam thi leh nu nau chunga thi an tam leh tlem azir a nih thu sawiin, "Mizoram Health & Family Welfare department hnathawh ṭhatzia lo lang ṭhin hi he department changtu minister Lal Thanzara thawhrimna leh Health department thawktute thawhrimna vang liau liau a ni tih Mizoram mipuite'n min hriatsak turin kan ngen a ni," an ti.

Congress party sorkar loh laiin Health department-in thawh ṭhat lawmman a lak thawm hriat tur a awm ngai lo nia sawiin MPCC chuan, Congress sorkara Health department-in lawmman a la ṭhin chu Congress sorkarin mipuite hriselna a dah pawimawhzia tichiangtu a nih thu an sawi bawk.