MHA din ramri buaipui tur Committee la ṭhukhawm lo
Ministry of Home Affairs (MHA) kaihhruaina hnuaia state ramri chungchang buaipui tura committee din chu an ṭhukhawm lo. Hetih lai hian Mizoram leh Assam chuan MHA-ah an document neihte an thawn mek.
Kumina Mizoram leh Assam-in ramria buaina an neih hmain MHA chuan Assam-in anmahni aṭanga indangte nena ramria buaina an neihte chinfel a nih theihna atan hma an la a. MHA chuan, state tin aiawhin anmahni aṭangin ramri chungchang buaipui turin nodal officer a ruat bakah, anmahni aṭanga nodal officer ruat ve turin state tinte a hriattir.
MHA hian sorkar laipui (MHA) aṭangin Mizoram nodal officer turin Joint Secretary (Security) a ruat a, Mizoram sorkar pawhin Home department additional joint secretary Ramdinliani chu nodal officer atan a ruat a ni.
Vanglaini palai zawhna chhangin Ramdinliani chuan, MHA-in committee a din chu an la ṭhutkhawm loh thu a sawi a, "Kan inbe pawp tlang reng a, pangngai taka thil sawiho erawh kan la nei lo," a ti.
Ramdinliani sawi danin, state hrang hrangte'n MHA-ah ramria document an neih ang angte an thehluh bakah, MHA-in duh leh mamawh a neih a sawite chu an thehluh belh mek zel a ni.