CSS-a thawkte'n hlawh an la ṭha lo RUSA-a thawkte'n thla 6 an la tawh lo

Rashtriya Uchchattar Shiksha Abhiyan (RUSA) hnuaia thawkte chuan kumin May thla aṭang khan hlawh an la tawh lo. Samagra Shiksha hnuaia thawkte'n thla thum chhung hlawh an la tawh lo a; National Health Mission (NHM) hnuaia thawk zinga a tam zawkin October thla hlawh an la lo bawk.

RUSA hnuaia college-a assistant professor-te hnen aṭanga thu dawn danin, RUSA hnuaia thawkte hian kumin May thla aṭang khan tun thlengin hlawh an la tawh lo a, hlawh an lâk tawh loh chin chu thla ruk a ni. RUSA hnuaia thawkte hlawh hi sorkar laipuiin 90% a tum a, state sorkarin 10% a tum ve thung.

Vanglaini palai zawhna chhángin RUSA hnuaia thawkte chuan, hlawh lâk theih loh chungchangah Mizoram sorkar hotute an dàwr fo tih an sawi a, "Kan dawr ngun a, lehkha kan thehlut deuh reng. Chief Minister, HTE Minister leh HTE department-ahte kan thehlut tawh," an ti.

RUSA hnuaia thawkte chuan, hlawh an lâk theih loh chhan chu sorkar laipuiin sum a rawn pek loh vang niin sorkar hotute'n an hrilh thu an sawi a, "Eng angin nge kan sorkar hotute hian Central lam an dàwr kan hre lo a, an nawr na tâwk lo niin kan hria," tiin, tun aia chak zawkin sorkar laipui nawr se an duh thu leh RUSA hnuaiah assistant professor 69 an awm thu an sawi.

SSA leh RMSA khaikhawmna, Samagra Shiksha hnuaia thawkte'n thla thum chhung, August-October thla hlawh an la la lo a, an lâk theih hun tur an sawi thei lo. SAMAGRA hnuaiah hian thawktu mi 4,000 vel an awm.

Vanglaini palai zawhna chhangin Samagra Shiksha páwl hruaitute chuan, hlawh an lâk loh chungchangah sorkar aṭangin thu dawn an la neih loh thu an sawi a, "Office lama ṭhute'n central aṭanga pawisa a lo la thlen loh thu an sawi a, chuvangin, kan nawr vak duh rih lo," an ti.

CSS dang, National Health Mission (NHM) hnuaia thawkte erawh chu hlawh lâk chungchangah tunah chuan an dinhmun a ṭha hret. Thawktu tam zawkin October thla hlawh la la thei lo mah se, ṭhenkhat chuan an la tawh.

NHM hnuaia thawkte sawi danin, NHM hnuaiah programme hrang hrang a awm a, an awmna programme azirin hlawh an lâk hun a inang lo ṭhin. Tun dinhmunah chuan, programme pahnih emaw vel hnuaia thawkte'n October thla hlawh an la tawh a, programme dang zawnga mite'n an la la lo a ni.