COVID-19: Mizoram dinhmun Hripui vei 37 hmuh belh a ni

November 17, Thawhlehni khan Mizoramah Covid-19 vei mi 37 hmuh chhuah a ni a, nimin khan mi 12 chhuahtir an ni thung.

Covid-19 vei Thawh­lehnia hmuh chhuahte chu mipa 25 leh hmei­chhia 12 an ni a; ZMC laboratory-a hmu mi 18, TrueNAT-PCR hmanga Serchhip leh Hnahthiala hmuh mi paruk leh, Rapid Antigen Test (RAT) hmanga Aizawl, Serchhip leh Lawngtlaia hmuh mi 13 an ni.

Hripui laka fihlîm tawh mi 12 chu nimin khan chhuahtir an ni a; an zinga pali chu SRH-ZMC aṭanga chhuak an ni a, mi dangte chu CCC aṭanga chhuak an ni. Thawhlehnia chhuahtir zingah nimina Vanglainia tarlan hman loh mi 53 an awm a, Thawhlehnia chhuak zawng zawng chu mi 57 an tling.

Mizoramah Covid-19 positive mi 3,481 hmuh chhuah a ni tawh a, mipa 2,586 leh hmeichhia 895 an ni. Nimin tlai dar 5 thleng khan mi 2,984 (85.72%) chhuahtir an ni tawh a, mi panga (0.14%) thi tawhin, enkawl mek mi 492 (14.13%) an awm.

Mizorama hripui vei hmuh tawhte zinga mi 1,595 chu Mizoram chhunga kái an ni a, mi 1,886 chu state páwn aṭanga rawn lut an ni.

November 17, Thawhlehni khan Mizoramah swab sample 2,125 endik a ni a, chu'ng aṭang chuan Covid-19 vei mi 37 an hmu chhuak. Sample endik dan chu - ZMC laboratory-ah mi 593, TrueNAT-PCR hmangin district pasarihah mi 88 leh, RAT hmangin district 10-ah mi 1,454 an ni.

Sorkar thuchhuah tarlan danin, ZMC laboratory-ah RT-PCR hmanga hripui vei hmuh chhuah mi 18-te chu mipa 11 leh hmeichhia pasarih niin, Aizawl district-a swab sample lak vek an ni a, a naupang ber kum 1 mi leh a upa ber kum 46 mi an ni.

ZMC-a hmuh chhuahte chu state páwn aṭanga tun hnaia rawn lut leh Mizoram chhunga kái mi pakua ve ve an ni. State páwn aṭanga rawn haw pakhat chu Khatlaa mipa kum 29 a ni a, quarantine facility-a awm mek niin, symptom a nei lo.

Mizoram páwn aṭanga rawn lut mi dang pariatte chu mipa vek, Border Security Force (BSF) leh Assam Rifles sipai pali ve ve an ni a; an hmuna inkhung hrang lai niin, symptom an nei lo vek. Mizoram chhunga káite chu a hranin tarlan a ni.

TrueNAT-PCR hmanga Covid-19 positive hmuh chhuahte state páwn aṭanga rawn lut vek an ni a; chu'ngte chu - Police Training School, Thenzawla awm police mipa panga, tun hnaia Bihar Assembly inthlanpuia duty rawn hawte leh Hnahthial Electric Venga mipa kum 25, Delhi aṭanga hawte an ni. An zavaiin symptom an nei lo.

RAT hmanga hmuh chhuah mi 13 zinga pahnih chu Bihar aṭanga rawn lut, Serchhip district-a awm an ni a, mipa kum 20 mi ve ve, Bhavya Construction hnuaia thawk niin, symptom an nei lo. Mi 13 zinga 11-te chu Mizoram chhunga kai an ni thung a, a hranpain an dinhmun tarlan a ni.