MNF hruai sorkar a din hnuah PWD-in Restricted tender-in hna 92 an pe tawh ; PMGSY-ah open tender an inchhàn hniamsiak - CM

PWD changtu chief minister Zoramthanga chuan INC member Zodintluanga Ralte leh ZPM member Vanlalhlana zawhna inṭawm ziaka chhángin, kum 2018-a ministry thar (MNF sorkar) a pian hnuah PWD-in restricted tender hmangin hna 92 an pek tawh thu House a hrilh. Chief Minister chuan, PMGSY-ah open tender an inchhàn hniamsiak thu a sawi.

INC member KR Rokhaw-a'n a biala PMGSY hna muang lutuk a sawi chung changah CM Zoramthanga chuan, PMGSY-a hnate open tender ngei ngei tur tih a ni chu a buaithlak thu sawiin, "An inchhàn hniamsiak a, below 10% chu la ziaawm viau a, below 25%-te'n an chhâng a, thawh ngaihna a awm lo hrim hrim. Pek loh dawnin court-a kal a ni a, sawi buai chhungin a period a liam hman leh ṭhin si," a ti.

Zoramthanga chuan, PMGSY kalpui dan chu Delhi-ah pawh a sawisel thu sawiin, "Court-a an kal loh nan leh hnain a tawrh loh nan schedule of rate eng emaw chin aia hniam lutuka chhàn phal lo turin ka ti. Court-a kal chuan a rei bawk si, kan buaina ber a ni. Restricted tender a nih ngawt loh chuan an inchhàn hniamsiak," a ti a; chung thilte chu sorkar hmasa pawhin an hriat a rin thu a sawi.

Chief Minister tarlan danin, PWD-in restricted tender hmangin Chief Engineer Building & other department hnuaiah hna 54, Chief Engineer (Road) hnuaiah hna 18 leh Chief Engineer (Highways) hnuaiah 20 an pe a ni.

Zoramthanga chuan, Chief Engineer Building & other department hnuaia restricted tender hmanga hna pekte chu hna hmanhmawh thlak a nih bakah, contractor narânin an thawh theih loh, specialised job a nih thu a sawi a, "Chief Engineer (Roads) hnuaia pekte chu hmanhmawh taka zawh ngai a nih vang a ni," a ti.

Chief Minister tarlan danin, Chief Engineer (Highways) hnuaia restricted tender-a hna pek a nih chhan chu, bituminous macadam leh bituminous concrete hnate chu experience nei tawh leh kháwl ṭha bik thawh chi a nih avang leh, CPWD Manual-in restricted chhuah theihna hrang hrang point paruk a sawi denchhenin hna hmanhmawh bik, thawh zawh vat ngai a nih vang a ni.