In sak vangin Champhai leileta LSC pahnih DC-in a tihtawpsak

Champhai leilet záwla in satu leh kudam satu mi pahnih chu Champhai district magistrate Maria CT Zuali chuan February 28, 2022 khan an LSC-te a tihtawpsak (cancel).

Thu dawn danin, Champhai leilet zawl, WRC area chu sorkarin Special Economic Zone tura a ruahman, Rice Bowl of Mizoram tia hriat a ni a; leilet záwl, WRC patta peknaa in leh kudam satu Sangneihvela s/o Sangbilha, Champhai Venglai leh Zosangpuii d/o R Lalbiakthanga, Champhai Electric Vengte chu an LSC tihtàwpsak an ni.

Sangneihvela leh Zosang­puii te hi an in sak chawlhsan turin vawi hnih ve ve hriattir an nih hnuah, danin a phal loha in an sak luih chhan District Magistrate/Collector hmaa sawi turin February 9, 2022 khan koh an ni. Dan hmaa thiam channa khawp sawi tur an neih loh avangin an in sakte chu ṭhiat a, leilet (WRC)-a hmang tur emaw, an ram pass sorkara pe lêt tur emaw a hriattir an ni.

Ti tura tihte chu an tih loh vek avangin Champhai District Magistrate chuan February 28, 2022 khan thupek chhuahin, The Mizoram Land Revenue Act, 2013 Section 19(ii) hmangin mi pahnihte WRC LSC no. 3091/17/09/12 of 2020 leh no. 3091/ 17/09/104 of 1991-te chu a tihtawpsak ta a ni.