Kamrul-a ST certificate cancel dilnaah Committee-in thutlukna a siam ang - CM

Nimina Assembly session-ah chief minister Zoramthanga chuan, Kamrul-a'n scheduled tribe certificate tihtawp (cancel) a dilna chungchangah a endik tur committee-in thutlukna an siam tur thu House a hrilh.

ZPM member Dr Vanlalthlana chuan, Kamrul-a'n a tribal certificate neih chhuanlamin chhiah a àwl leh àwl loh a zawt a, "Income tax danah chuan chhiah chawi tur a ni. Tribal certificate cancel sak a nih chuan consultancy firm a dilnaah non-tribal anga a dil chuan a dilna hi hman tlak loh a ni thei. A tribal certificate hi cancel a nih chuan a hna hmuh tawhte cancel tumna a awm em?" a ti.

CM Zoramthanga chuan, Kamrul-a'n tribal certificate cancel a dilna chu en mek a nih thu sawiin, "A endiktu tur committee-in an endik ang a, thutlukna an siam ang," a ti a, Kamrul-a tribal certificate chu a kaihhruai sorkar pek a nih loh thu a sawi.

Kamrul-a'n hna a thawh tawh leh thawh mek chungchangah Chief Minis­ter chuan, "A tribal certificate cancel dilna ngaihtuah lai mek a ni a, han chiang phawt se. A thawh tawh a rûl tur a ni, a rûl lo tur a ni tihte chu committee-in thutlukna han siam phawt se. Keini lam thutlukna siamna tur a ni lo. Kum 10 chhung vela a hnathawh tawh dan pawh kan inpe vek ang, thil harsa a ni lo," a ti.

Congress Legislature Party leader Zodintluanga Ralte zawhna chhangin Chief Minister chuan, Bawng­kawn péngṭhuam leh Vaivakawn péng­ṭhuamah motor kawng chhâwng siam tum a nih thu a sawi.

CM Zoramthanga chuan, motor kawng chhâwng atan hian consultancy firm - Telecommunication Consultant India Ltd.-in draft feasibility report an thehluh tawh thu a sawi a, "Central ministry-ah approve (pawmpui) tura thawn tawh niin, approval (pawmpuina) nghah mek a ni," a ti.