Manipur inthlana duty Mizo police-te Lirthei chesualah police pakhat a thi

Thawhlehni zan zanlai pelh hnu, nimin zing lam dar 1:30 vel khan Manipur Assembly inthlana venhim hna thawk mek Mizo 2nd IR battalion mite chuanna lirthei (pick-up) chu Tamenglong district-a Tamenglong College bulah a chesual a, police pakhat, K Lalawmpuia, Champhai Bethel Veng a thi.

Thu dawn danin, lirtheiah hian Mizo police 15 an chuang a, a chetsual chhan chu brake ṭhat loh vang nia hriat a ni. Mi 11 hliamin, K Lalawmpuia chu damdawi-in panpui a nih laiin a thi a, mi dang 10-te pawh damdawi-inah hruai niin, an zinga panga chu an nat deuh avangin Imphal-ah thawn an ni.

Mizo 2nd IR police-a D company leh E company-te chu Tamenglong College-ah awmtir an ni a, a luhna kawng chu a têt avang leh a chhuk/chhoh avangin luh chhuah nan leh mamawh lak khawm nan pick-up truck an hmang ṭhin a ni.

Chetsualna chungchang hi chief minister Zoramthanga chuan nimin khan social media-ah a tarlang a, "Motor-a chuang Const. Pu Lalawmpuia, Champhai Bethel Veng chuan a nunna a chán hlauh mai tih ka hriatin ka rilru a na hle mai. A kalsan tâk a chhungte leh amah hmangaihtu zawng zawngte chung Pathianin thlamuanin awmpui tlat rawh se. Hliam tuarte pawh an lo dam leh thuai theihna turin ka ṭawngṭai a. Mizoram sorkar leh Manipur sorkar pawh a inbe reng a, in tan theihtawp kan chhuah zel dawn," a ti.

Thil thleng chungchang hi Home minister Lalchamliana'n Assembly session-ah nimin khan a sawi chhuak bawk.

Mizoram Armed Police Association chuan, Tamenglong khuaa chetsualnaa Mizoram police thi chu Rs 5,000-a an ràl dawn thu leh hliamte chu Rs 2,000 ṭheuha an kan dawn thu an tarlang.