Power dept. corporation-a leh tumna a awm - R Lalzirliana

Power & Electricity minister R Lalzirliana chuan ZPM member C Lalsawivunga zawhna ziaka chhangin, Mizoram Power & Electricity department chu corporate-a leh tumna a awm thu Assembly House a hrilh.

R Lalzirliana chuan PE department chu corporate-a let tura hmalak dan tarlangin, PE department chu functional unit pathum - Transmission, Generation leh Distribution unit-ahte ṭhen tum a nih thu a tarlang.

Minister chuan, "Adminis-trative Staff College of India (ASCI)-in Final Report on Reforms and Restructuring of Mizoram Power Sector a siam a, rawtnate zir chiang tur hian Mizoram sorkar chuan task group a din tawh a, task group hian hma a la mek a, tunah hian department-a study team-te'n an zirchianna leh ruahmanna siam an peih ṭêp a ni," a ti.

R Lalzirliana chuan, Mizoram sorkarin kawlphetha megawatt 50 aia tam siam chhuak thei project a neih tarlangin, Mat-Sekawi Hydro Electric Power Project siam a nih thu a tarlang a, "Mat-Sekawi HEP megawatt 76 hi Rotlang East khaw bul, Lunglei district-a siam tura ruahman a ni," tiin zawhna a chháng.

Minister tarlan danin, Mat-Sekawi HEP atan hian project survey & investigation tih belh ngai leh detailed project report siam tura WAPCOS Ltd.-in an siam theihna man an thehluh chu sorkarah thehluh a ni tawh a, bawhzui mek a ni.

Power Minister chuan, Mizorama kawlphetha pek chhawnnaa hloh (power transmission loss) nasa lutuk tihniam turin sorkarin ruahmanna a nei a, chuta tan chuan cheng nuai 29,074 ruahman a nih thu leh, power transmission loss tihniam tura hmalakna atan kum 2020-21 chhungin cheng nuai 1,055.56 hman a nih thu a tarlang.

R Lalzirliana chuan, kum 2021 chhungin Mizoramah vawi khat kawlphetha hman man tihsan a nih thu leh, January-December 2021 chhunga kawlphetha hman man consumer-te pek tling khawm chu cheng nuai 24,679.42 a nih thu a tarlang bawk.