Ruling leh eptu MLA-te'n MLA fund duhsak záwngte an pek cháng a awm - Lalruatkima

Nimina Assembly session-ah ZPM Legislature Party leader Lalduhoma zawhna kal zelah Rural Development minister Lalruatkima chuan, ruling leh eptu MLA-te'n MLA fund hmanga hna thawhte an duhsak zawngte an pêk cháng a awm thu a sawi.

Lalduhoma zawhna chhangin RD Minister chuan, Tlawng lui Nghalchâwm kàia thîr lei dawh hna chu RD Executive Engineer-in an thawh thu a sawi a, "Hna hi November 17, 2021-ah thawh ṭan a ni a, estimate-ah chuan thla 5 chhunga thawh zawh tura ruahman a ni. Amount chu cheng nuai 30.40 a ni," a ti.

Lalduhoma chuan, lei dawh hna thawktu tak chu Aizawl West-I Block MNF an nih thu sawiin, "An rod hman sût thum a ni a, balu pangngai an hmang lo. Ban khur a thûk lo em em a, mipuiin a tlo loh an hlau," a ti a, hlêp tam lutuk loa ṭha deuh hleka dawh theih dan a awm leh awm loh a zâwt.

Congress Legislature Party leader Zodintluanga Ralte chuan, RD hnuaia hna tam tak chu departmental work veka tih a nih thu sawiin, "A thawktu BDO tih vek a ni a, eng emaw palhah an duh vang rêng ni loin an tuar thei. Departmental work anga hna zawng zawng kal hi siamṭhat theih a ni em?" a ti.

Lalruatkima chuan, "MLA fund-te pawh hi implementing agency ruat ni mah se, i dinglam leh veilama mite hian an duhsak zawng an pêk cháng a awm fo. RD department hnuaia hnate hi guideline nei a ni a, MLA fund angin kalphung a nei vek," a ti a, hlawhfa rawih leh mistiri rawih an hriatpui loh thu a sawi.

Iron rod hman a têt thu sawi chungchangah RD Minister chuan, "Kan lo en ang. Kan fimkhur a ngai hle. Khulai velah khuan lei dawh chimte a lo awm tawh si," a ti.