Governor-in BCM hruaitute a kâwm

Governor Hari Babu Kambhampati chuan nimin khan Raj Bhavan-ah Baptist Church of Mizoram (BCM) hruaitute a kâwm a, sorkar laipui scheme-te mipuiin an hman ṭangkai theih dan tur a sawipui.

Larsap chuan, Mizoram hmun hrang hrang a tlawh hnuah Mizoram mipui tam zawkin central aṭanga social security scheme-te an hriat loh avangin an dawng lo tih a hmuh thu a sawi a, “Hei hi thinlung takin ka vei. Vawi tam tak bank, sorkar hotute leh tlawmngai pawl hruaitute ka kawmnaah pawh ka sawi ṭhin a, Mizoram mipui tam thei ang berin central aṭanga hamṭhatna an dawn hi an chanvo a ni,” a ti.

BCM-in mipui vantlang rawngbawlna huangah hna ṭha tak a thawk tih sawiin Kambhampati chuan, “Zirna leh tihdam rawngbawlna huanga in hnathawhte a chhuanawm. In feh chhuahna apiangah mipui hamṭhatna tura sorkar scheme ṭha tak takte hi sawi tel ṭhin ang che u,” a ti a; Mizoramah kohhran chu mipui rawngbawltu pawimawh ber pakhat an nih thu a sawi.

BCM hruaitute chuan, Mizoram mipui hamṭhatna tura Governor ṭhahnemngaihna chu lawmawm an tih thu sawiin, hun remchang apiangah mipui zirtirna kalpui ṭha an tih thu an sawi a; Mizorama chêng tam ber chu Kristian an nih thu te, Pathiannia inthlan leh exam buatsaih a ni ṭhinte chuan an rilru a tihnat ṭhin thute an sawi bawk.

Governor leh BCM hruaitute inkawmnaah hian BCM president Rev. Dr Zolawma, executive secretary Rev. Dr R Lalthanmawia bakah, Rev T Lalsangvunga leh Rev K Lalbiakchhawna te an tel a ni.