Ruihhlo laka naupang venghim ṭha ber District zingah Champhai district a tel

National Commission for Protection of Child Rights (NCPCR) leh Narcotics Control Bureau (NCB) chuan ruihhlo tih leh damdawi hman sualna laka naupang venhim leh a ti tawhte chhan chhuah kawnga India rama hma la ṭha ber district 20 a thlan zingah Champhai district a tel a, nimin khan lawmman hlan a ni.

Naupangte ruihhlo laka venhimna lama hma la ṭha ber district, Best Performing District lawmman hi district bawrhsap Maria CT Zuali hminga hlan a ni a; lawmmante chu nimin khan Vigyan Bhavan, New Delhi-ah sem niin, Champhai DC aiawhin Mizoram State Commission for Protection of Child Rights chairman Dr Sangzuala'n a dawng.

NCPCR hi The Commission for Protection of Child Rights (CPCR) Act, 2005 hnuaiah din a ni a, state tinah state commission din a ni bawk. NCPCR leh NCB ṭang dun chuan Joint Action Plan on Prevention of Drug and Substance Abuse among Children and Illicit Trafficking an kalpui a, February 2021 khan ṭan a ni.

Joint Action Plan-in a tum chu, naupangte ruihhlo laka venhim leh a ti tawhte chhanchhuah a ni a, India rama ruihhlo hluarna district 272-ah kalpui a ni. Action Plan hnuaiah hian NCPCR leh NCB chuan district 272 zinga hma la ṭha ber district 20 an thlang chhuak a, chu'ng zingah chuan Champhai district a tel a ni.