Indo-Myanmar border trade point-ah sorkarin chak takin hma a la mek - Dr R Lalthangliana

Commerce & Industries minister Dr R Lalthangliana chuan nimin khan MNF member Dr ZR Thiamsanga zawhna chhangin, Zokhawthara Indo-Myanmar border trade point-ah sorkarin chak taka hma a lak mek thu House a hrilh.

Dr R Lalthangliana chuan, border trade point atan hian central sorkar aṭangin Special Central Assistance to State under Capital Expenditure aṭangin cheng nuai 1,500 hmuh a nih thu a sawi a, “He sum hmang hian Zokhawthara Land Custom Station hi infrastructure tihchangtlun tura project siam niin, thil chi hrang hrang sak tura ruahman a ni. Contractor pawh thlan a ni tawh,” a ti.

Minister sawi danin, Zokhawtharah hian immigration check post, animal quarantine station, plant quarantine station laboratory, food processing laboratory atana building awm sa thuam ṭhat, weighbridge awm sa siamṭhat, warehouse siamṭhat bakah, office leh staff quarters sak a ni dawn.

Hmuh theih chinah insumdawn tawnna atan Myanmar sorkar hmalakna hmuh tur a tam lo tih sawiin R Lalthangliana chuan, “An sorkar a la mumal theih loh avangin hmalakna an la nei hlei thei lo pawh a ni ang,” a ti.

Dr R Lalthangliana chuan, India leh Bangladesh ramria integrated check post, Kawrpuichhuahah a hungna (fencing) atan ram buatsaih zawh thawkhat a nih thu sawiin, “Fencing post phun tura hmalak mek a ni. A project pumpui design pawh peih tawh a ni a, DPR pawh Land Port Authority of India-in an pawm tawh,” a ti a, forest clearance atan Revenue department-in hma an lak mek thu a sawi.

Mizoram sorkarin Indo-Bangladesh Border Haat atan pilot project-ah Silsuri a ruahman thu sawiin Minister chuan, “Lehkha pawimawh zawng zawngte pawh a thawn thla tawh. Sorkar laipui hian Bangladesh sorkar remtihna la turin hma an la mek. Bangladesh sorkar pawh hian min phûrpui khawp mai,” a ti.