Hnam dang driver khawihtute man

Mizoram Police chuan nimin khan thuchhuah siamin, November 16, Thawhṭanni zan dar 7 vela Lalthanzauva Filling Station bula hnam dang driver kutthlaktu mi panga man an nih thu leh, Judicial custody (jail)-a awm turin Court-ah an thawn thu an tarlang.

Police thuchhuah chuan, kut inthlak chu thil pawi tak, na taka hrem theih a nih bakah, chî leh chî inkara remna leh muanna tichhe thei a nih avangin, mipui, a bikin ṭhalaite chu inhnamhnawih lo turin a ngen a; dàn zàwm lote chungah dan angin a ṭul anga hremna lek zel a nih dawn thu a sawi.

Police thuchhuah tarlan danin, November 16 zan dar 7 vel khan hnam dang driver pakhat chu Lalthanzauva Filling Station bulah tleirawl pangain a motor chhungah kut an thlâk a, driver chu hliamin, Sairang damdawi-in (PHC)-ah enkawl a nih hnuah chhuahtir a ni.

Thil thlengah hian hnam dang driver thawhpui Mizo driver-in complaint a thehlut a, Sairang Police Station-ah thubuai ziah luh a ni. Kutthlaktu mi panga man an ni a, zu an in vek tih breath analyser hmanga finfiah a ni.