Congress Ṭhalaiin old age pension pe turin sorkar phût

Congress party ṭhalaite chuan, old age pension (tar pension) chu MNF hruai sorkarin an kalpui mumal thei lo nia sawiin pawi an tih thu an tarlang a; nikum aṭangin an pek theih tawh loh chu rang taka pe thuai turin Mizoram sorkar an phût.

Mizoram Pradesh Youth Congress Committee (MPYCC) chuan, “Old age pension hi tihpun a nih tur thute hriat a nih laia nikum aṭanga vawiin thlenga sem theih a ni ta lo hi he sorkar hian kum upa zawkte a ngaihthahzia a lang a ni,” an ti a; health care sum pek mumal theih loh, sorkar hnathawk pension pek mumal theih loh leh sorkar hnathawkte chanvo pek mumal theih lohte chuan sorkar rorelna ṭhat lohzia a tichiang niin an sawi.

Finance enkawltu chief minister Zoramthanga chu sum enkawlah a hlawhchham tih sawiin MPYCC chuan, “Restricted tender kaltlangin a duhsak zawngte an thawh sèn loh hna a pe mawlh mawlh lawi a. Finance Minister hian a duhsak zawngte sum siam nan ṭhahnem a ngaih tehlul nen, mipui mamawhna leh chanvo a ngaihthah hle thung,” an ti.