MFM-in Mizoram hmasawnna atan an pawl zawm turin mipui an sáwm

Mizoram First Movement (MFM) hruaitute chuan nimin khan Aizawl Press Club-ah thuthar thehdarhtute an kâwm a; Mizoram hmasawnna leh changkanna tur duha indin an nih thu sawiin, an movement zawm turin Mizo mipui an sáwm.

MFM president Lalnunmawia Chuaungo, IAS (Rtd.) chuan, MFM chu mi ṭhahnemngaite’n an ngaihtuah chhuah a nih thu sawiin, “Mizoram sorkar kalphung leh khawtlang inrêlbàwlna duhkhawp lohna a lian. Thil zawng zawng a chhe vek tihna a ni lo a, sorkar mek leh sorkar kal ta pawhin thil ṭha tam tak an ti ang. Kan khawtlang nunah pawh thil ṭha tak tak a awm, siamṭhat ngai erawh a awm a ni,” a ti.

Lalnunmawia Chuaungo chuan, mimal hmalaknain awmze neih chin awm mah se, awmze nei zawka hmalak a nih theih nan thawhho a ṭul tih sawiin, “MFM hi mi ṭhahnemngaite’n thawhhona ṭha tak an neih theihna tura siam a ni. Sorkar hnathawk, sumdawng, kohhran, pawl leh mimal tu pawh an leng vek,” a ti a, an pawl chu politics-a inhnamhnawihna nei lo a nih thu a sawi.

Mi aia an ṭhat bik loh thu sawiin Lalnunmawia chuan, “Kan chhungkuaah ṭheuh pawh duhthusam kan ni bik lo. Ram inrêlbâwlnaah tun aia ṭha leh felfai zawka kal dan a awm tih ngaihdan neitute kan ni. Kan pawl hi Zo fate ṭhatna tur, hmasawnna tur leh thawhhona tur forum a ni,” a ti.

MFM hruaitute chuan, Mizoram kalphung duhkhawp lohna avangin mi tam tak an phun tih sawiin, “Kar khat velah a reh leh mai zel. Inthlan dawnah thiam takin thu an sawi a, tawktarh rawn neiin kan lo vote leh mai zel. Awmhmuna kan nghah reng chuan kan ramah khua a vár dawn lo, khua a var theihna tura pên chhuak kan ni,” an ti a, an movement zawm turin mipui an sáwm.

MFM hruaitu dangte chu - vice president Lalnunkunga Sailo leh Vanramchhuangi, general secretary Dr Rohmingmawii te an ni.