Lockdown leh No Tolerance Drive-in Awmzia a nei - Sorkar hotute

Nimin khan Health minister Dr R Lalthangliana hoin Secretariat conference hall-ah sorkar hotute an ṭhu a; tun hnaia Aizawla inkharkhip leh Mizoram puma Covid-19 No Tolerance Drive kalpui mek thlirho a ni. Report hrang hrang aṭangin sorkar hmalaknain awmzia a nei niin an ngai.

Meeting-a Integrated Disease Surveillance Programme (IDSP) report danin, Covid-19 positive enkawl mek zingah civil mi 461 an awm a, heng zingah hian Mizoram police, Bihar-a election duty kal haw mi 61 chhiar tel a ni. Frontline worker mi 14 leh central armed police forces (BRO chhiar telin) mi 29 an awm.

Aizawla inkharkhip chhungin chawhrualin ni tin swab sample endik tur 900 vel lâk a ni a, inkharkhip zawh hnu November 17, Thawhlehni thleng khan chawhrualin ni tin sample test tur 550 lak a ni. Inkhàrkhip laiin chawhrualin ni tin positive thar 38 (4.21%) hmuh chhuah a nih laiin, inkhàrkhip zawh hnu Thawhlehni thleng chawhrualin ni tin hripui vei 38 (4.27%) hmuh thar a ni.

Indian Medical Association (IMA) chuan, Mizorama Revised Discharge Protocol hman mek chu a him ṭha tâwk riha an ngaih thu an sawi a, "Covid-19 hri léng danna atana pawimawh sûlhnu application QR code chu dawrkai tinin hmun remchangah tárin, hming ziahna register chhawp vek se," an ti.

Contact Tracing Team tarlan danin, October hmaa positive hmuh chhuah zinga 15% chu symptom nei an ni. Lockdown laiin mi an chhuak tlem a, chu chuan contact tracing a tihawlsam bakah, hri inkài chhàwn a tlem phahah an ngai. Chhungkaw hrang hrang 199-ah positive inkài chhâwng an awm tawh a ni.