MZP-te leh Thangram awmte inkâwm; Mizorama sem turin buhfai an pe

Nimin khan Kanhmuna BRC Hall-ah Mizo Zirlai Pawl (MZP) hruaitute leh Thangram Indigenous People's Movement (TIPM) hruaitute an inhmukhawm. Thuchhuah siamin, "MZP leh TIPM chuan Zo fate inlungrual taka kan awm zel theih nan hmalakho zel ni se," an ti.

Inhmuhkhawmnaah hian Thangram khaw huam chhunga Zo hnahthlak hnam péng hrang hrang - Chorei, Hrángkhawl, Molsom, Ranglong leh Sakachep aiawhte an tel a; MZP Gen.Hqrs president B Vanlaltána'n a kaihruai.

TIPM hruaitute chuan, Thangram huam chhungah Zo hnahthlak hrang hrang mi sing khat aia tam an awm thu te, an awmna chu Assam sorkarin an state chhunga chhál siin, Zo hnahthlakte chu nasa taka ensan an nih ṭhin thu te, voter ID pawh an pek mai duh loh ṭhin thu te, harsatna tam tak an siamsak ṭhin avangin an rilru a nat ṭhin thute an sawi.

Thangram chhunga Zo hnahthlakte chu hnam dang awmte nen thliar hran an nih ṭhin thu sawiin, "Ei leh bàr zawnna kawngah nasa takin harsatna kan tawh phah. Square miles 108 chhunga awm Zo hnahthlak zawng zawng hian Mizoram sorkar enkawlna hnuaia awm kan duh a ni," an ti a; an duh dan chu a ṭul anga Mizoram sorkara thlen turin MZP an ngen.

MZP hruaitute chuan, Thangram huam chhunga Zo hnahthlakte tawrhna leh endawng an nihna chu Zo fate tawrhna a nih thu an sawi a; an harsatna leh buainaah an theih ang anga hmalakpui an tum thu an hrilh bawk.

Thangram chhunga Zo hnahthlakte chuan Mizoram mipui tan an thawh khawm buhfai quintal 15 chu a remchan anga sem turin MZP hruaitute hnenah an hlàn a ni.