HFW Dept-in voice message an chháng; Covid-19 discharge protocol an sawifiah

Health & Family Welfare department chuan November 17, Thawhlehni khan thuchhuah siamin, Covid-19 veite enkawlna hmun aṭanga chhuahtir (discharge) chungchanga sorkarin kaihhruaina a siam an sawifiah. Rapid Antigen Test (RAT) hmanga test negative chhuahtir tawh zingah mi dang kài chhâwng leh report sorkarin a la dawn loh thu an tarlang.

Health department chuan, tun hnaia social media-a voice message hmanga thu belhchian dâwl lo thehdarh a ni chu ṭha lo an tih thu an tarlang a, "Social media-a rawn thehdarhtu hian RAT negative hi a rin loh avangin hetianga rawn ti mai hi a nih a rinawm," an ti.

Sorkar thuchhuah tarlan danin, MoHFW Guidelines siam thar behchhanin covid care centre, dedicated covid health centre, dedicated covid hospital leh home isolation-a awmte chhuahtir dan turah September 25, 2020 khan discharge policy thar tihchhuah a ni.

Discharge policy tharah chuan, Covid-19 positive-te ni 14 hnua RT-PCR hmanga test nawnnaa negative-te chiah chhuahtir ni ṭhin chu tihdanglam a ni a; ni 10 hnuah RAT negative-te chhuahtir theih, tih a ni tawh.

October 31-ah sorkarin revised discharge protocol siam thar lehin, positive-te chu anmahni enkawlna hmuna ni 10 an awm hnua RAT-a negative-te chu chhuahtir tur an ni a, an chhuah hnuah ni sarih chhung inah mahni dinhmun chîk taka inen chunga inkhung hran zui tur a ni.

Health department chuan, Revised Discharge Protocol for Covid-19 Patient chu tute emaw avanga ennawn a nih loh thu sawiin, "ICMR-in discharge policy a siam ang dung zuiin, mipui him nan leh kan ram dinhmun mil zelin revised zawk a ni," an ti.