Mizoramah AYUSH hmasawnna ruhrel tihhmasawn kan tum - AYUSH Minister
Union AYUSH minister Sarbananda Sonowal chuan nimin khan Dawrpui Multipurpose Hall-ah AYUSH hospital khum 50 awmna tur paruk leh khum 10 awmna tur pathum sak tur lungphùm a phúm a, AYUSH Health & Wellness Centre unit 24 a hawng bawk. Minister chuan, Mizoramah AYUSH hmasawnna ruhrel tihhmasawn an tum thu a sawi.
AYUSH Minister chuan, Mizoramah AYUSH ministry-in theihtawp chhuahin hma an la dawn tih sawiin, "Mipui hriselna atan leh natna do kháwl tihchakna atan thil pawimawh tak a ni a, Mizoramah AYUSH infrastructure facility tih hmasawn kan tum a ni," a ti.
Mizoram chu India rama state hlawhtling ber pawl a la ni dawn tih a chian thu sawiin Sonowal chuan, "Zirnaah hma hruaitu zinga mi in ni a, culture leh society ṭha tak in nei a ni," a ti a; hmasawn zel turin rél kawng leh tui kawng (waterway) lamah Mizoramin inkalpawhna ṭha a mamawha a hriat thu a sawi.
Sarbananda Sonowal chuan, Mizoram a ṭhan zel tur thu sawiin, "Tun hma chuan hmarchhak state-te hi Prime Minister leh minister-te'n an ngaihsak ngai lo. Tunah chuan PM-in hmarchhak hi a ngaihtuah a, an hmasawnna tur a ngaihven em em. A minister-te pawh tlawh a, an ministry hnuaia scheme-te thlentir turin min ti a ni," a ti.
Chief minister Zoramthanga chuan, Union minister tam tak an lo dawnsawn tawh thu sawiin, "Hmarchhak aṭanga Union minister-te an lo kal hian a danglam bik a ni," a ti a, Sonowal chuan Mizoram hre chiang tak a rawn hruai thu a sawi.
Chief Minister chuan, Mizoramin medical plant lamah theihna ṭha tak a neih thu sawiin, "Natural hi chuan side effect a nei lo mithiamte'n an ti. India-in AYUSH lamah ṭan a la a, a lawmawm hle. Mizoram mai ni lo, hmarchhak state dangah pawh medical plant hmuh chhuah tur tam tak a awmin a rinawm," a ti.
Inkhawm zawha thuthar thehdarhtute a kawmnaah Vanglaini palai zawhna chhangin AYUSH Minister chuan, "Scientific evidence ṭha tak kan neih theih a, kan thil hmuh chhuahte hman tlak a nih theih nan AYUSH sector hrang hrangte'n ṭan kan la mek," a ti a, medical plant hmuh chhuah aṭangin food supplement leh vitamin ṭha chi hrang hrang siam chhuah theih a nih thu a sawi.
Sarbananda Sonowal chuan, ram chhungah nasa taka AYUSH a ṭhan mek thu sawiin, “AYUSH product hralh chhuah phalna hmuh a nih hnuah khawvel hmun hrang hranga hralhna dollar tluklehdingawn 18.8 a tling tawh. Hei hian AYUSH product hi taksa tihchakna atan mi tam takin an pawmzia a tilang,” a ti.
Ports, Shipping and Waterways minister ni bawk Sonowal chuan, Kawrpuichhuah kaltlangin Kolkata-a waterway hmanga bungraw phurh theihna atan ruahmanna kalpui mek a nih thu sawiin, “Lawng hmanga bungraw phurh hi a man a tláwm ber,” a ti a, waterway hmanga inkalpawhna chu theihtawp chhuaha an buaipui zel tur thu a sawi.
Tui kawng la nei lo Mizoram duhsak bik theih a nih leh nih loh Vanglaini palaiin zawhna chhangin Sonowal chuan, “Agency rintlak tak, zir chiangtu tur kan nei tawh. An zirchianna azirin sorkar chuan theihtawp chhuah kan inhuam reng a, bungraw inthawn leh mihring inkalpawhna atana a ṭangkai dawn avangin sorkar chu kan inpeih sa reng,” a ti.
Khum 50 awmna AYUSH hospital hi Aizawl, Champhai leh Hnahthialah sak a ni dawn a, khum 10 awmna AYUSH hospital chu Khawzawl, Saitual leh Zawlnuamah sak a ni ang.
Sonowal thusawi ṭhenkhat
1) Zirnaah hma hruaitu zinga mi in ni a, culture leh society ṭha tak in nei a ni
2) Hmasawn zel turin rél kawng leh tui kawng lamah Mizoramin inkalpawhna ṭha a mamawh
3) Tun hma chuan hmarchhak state-te hi Prime Minister leh minister-te'n an ngaihsak ngai lo
4) Medical plant hmuh chhuah aṭangin food supplement leh vitamin ṭha chi hrang hrang siam chhuah theih a ni
5) Kawrpuichhuah kaltlangin Kolkata-a waterway hmanga bungraw phurh theihna atan ruahmanna kalpui mek a ni
6) Waterway-ah a zirchiangtu kan neihte zirchianna azirin sorkar chuan theihtawp chhuah kan inhuam reng