April 2022 aṭangin sikul kái ṭan dawn

School Education minister Lal­chhandama Ralte chuan, Mizoramah academic session thar, April 2022 aṭangin dan pangngaiin sikul hawn ṭan tum a nih thu a sawi.

Education Minister hian March 2, Ningani zan khan Assembly session-a a demand sawihona a khaikhawmnaah, kumin April thla aṭangin dan pangngaia sikul kal ṭan a nih tur thu a puang a, "Pathianin zah a ngai ang a, hri pawh hian kiam lam a pan turah kan ngai a. April-a sikul kan ṭan hunah chuan offline-in, a pangngaiin sikul kal ṭan kan tum tawh a ni," a ti.

Lalchhandama Ralte chuan, "Nu leh pa te, zirtirtute leh zirlaite inbuatsaih ila. Hri a la lêng ang, mahse, SOP (inkaih­hruaina) vawng ṭhain, ṭha taka zâwm chungin kalpui kan tum ang," a ti a; April aṭanga sikul hawng ṭan turin Chief Minister nen an sawi dun thu a sawi.

Minister chuan, Education depart­ment chu Covid-19 hripui tuar ber an nih thu sawiin, "Zirlai naupang nuai thum deuh thaw class kal chak em em kal thei loin, a ṭhen phei chu uniform la ha reng reng lo sikul kal ṭan tur an awm. Pawl 10 pass hlim, pawl 11, pawl 12-te pawh class kal mumal loin college zawmte pawh a ngai dawn tawh a ni," a ti a; online class kalpui ni mah se, internet ṭhat tâwk loh avangin duhthu a sam lo tih sawiin, "Offline-a kan kala 50% ang hi a takah kan score pha ang em aw..." a ti.

Education Minister chuam, Myanmar aṭanga sahimna zawnga rawn ráltlân zingah lehkha zir rual naupang tam tak an awm tih sawiin, ráltlan zinga zirlai 2,526 chu sikulah luhtir an nih thu a sawi a, "Matric-ah exam tur mi 25, higher secondary school-ah mi pahnih, an vaiin mi 27 chu board exam turin kan ruahmansak. Dan pangngaiah chuan pawl 9 emaw, 11 emawah registration tih a ngai a, mahse, kum khat chauhin registration kan siamsak a, board exam an nei ve thei hi kan lawm hle," a ti.

Lalchhandama Ralte chuan, a thlawnin zirlai 90,835 hnenah uniform an pek thu leh zirlaibu 99,492 an sem thu te, CSS hnuaiah Hindi zirtirtu mi 806 an lak tawh thu te, kum 2022-23 aṭangin naupang mit chak lote tan hawrawp lian bik zirlaibu an pek dawn thu te, pawl 6-8 zirlaiah zirlaibu thar (supplementary reader), Mizo thil leh zia hriat theihna tur 'Zonun' tih telh thar a nih dawn thute a sawi bawk.