Union Minister-in Larsap leh CM a kâwm
Ports, Shipping & Waterways leh AYUSH changtu Union minister Sarbananda Sonowal chuan nimin khan Raj Bhavan-ah Governor Dr Hari Babu Kambhampati a kâwm a, March 2, Nilaini zan khan chief minister Zoramthanga chu a bangla-ah a kâwm bawk.
Governor chuan, sorkar laipuiin project - Bairabi-Sairang rél kawng leh Kaladan Multi Modal Transit Transport Project (KMMTTP) bakah, PM-DevINE hnuaia project a pek avangin Mizoram mipui an lawm thu a sawi a, "Rel kawng leh KMMTTP a puitlin hunah chuan Mizoram hmel a danglam dawn a, state hmasawn nasa ber pawl a ni dawn a, kan nghakhlel hle a ni," a ti.
Sarbananda Sonowal chuan CM Zoramthanga a kawmnaah, sorkar laipuiin India hmarchhak ṭhan len leh hmasawnna a ngai pawimawh tih a sawi a; Chief Minister chuan, inland waterway chungchanga Mizoram hmachhawpte a hlawhtlin theih nan hma lakpui tur te, Mizoram tan all India service-ah cadre hran neih a pawimawh thu leh cadre hran a awm loh avanga sorkar inrêlbàwlnaah harsatna a awm phah thute a lo hrilh.
March 2 vêk khan Secretariat conference hall-ah Union Minister chuan Transport minister TJ Lalnuntluanga leh department official-te nen Mizorama lui liante cheibàwl leh inkalpawhna (inland waterway) siam dan tur an sawiho a; Sonowal chuan, Mizorama lui hmanga inkalpawhna siam a nih theih nan sorkar laipui leh Mizoram sorkarin thawhhona ṭha zawk an neih theihna tur ngaihtuahho a nih thu a sawi.
Ports, Shipping & Waterways Minister chuan, an sorkar tirh aṭangin Mizoram leh hmarchhak state dangte kawng tinrénga hma an sâwn theihna tur a ngaih pawimawh thu sawiin, "Kawng tam takah hmasawnna hmuh tur a awm zel a, India ram hmasawnna leh intodelhna turin state tin ten hma an sawn a ṭul," a ti a; Mizoram chu sorkar laipui hmalaknain India rama state hlawhtling ber zinga chhiar tel a nih thuai a beisei thu a sawi bawk.
TJ Lalnuntluanga chuan, mamawh la lut turin kawngpui pawimawh pakhat chauh a awm avangin Mizoramin harsatna a tawh fo thu a sawi a, "Mizorama lui liante cheibâwl a, bungrua leh mamawh dang lak luhna atan bakah, zin veivâkte chhawr ṭangkai theih turin inland waterway siam a ṭul," a ti.
Transport secretary KT Beichho tarlan danin, Mizoram sorkarin inland waterway project - Khawthlangtuipui - Tuichawng (km. 23) atana DPR thehluh tawh chu sorkar laipuiin a pawm tawh a; a thawh khatna atan CSS hnuaiah cheng vbc 6.17 ruahman a ni.
Tlawng lui hmanga Khamrang aṭanga Gharmura, Assam pawh theihna tur km. 87.136-a thui siamna turin survey tih tawh a ni a, DPR siam niin, Inland Waterways Authority of India (IWAI) Chairman hnenah thehluh a ni tawh. Chhimptuipuiah Tuipui-D aṭanga Lomasu pawhna tur km. 138.26-a thui atan final proposal thehluh hmabak a nih bakah, Khawthlangtuipuiah Rajivnagar aṭanga Tuichawng khua (km. 128.08) inkalpawhna tur ruahmanna thehluh a ni tawh bawk.