Vairengte-Sairang inkar zângnadawmnaah ZPM MLA-te'n thil dik lo a awmah an ngai ; Zângnadawmnaah dept. a inrawlh lo - LRS Minister

Nimina Assembly session-ah ZPM Legislature Party (ZLP) leader Lalduhoma leh deputy leader Vanlalhlana te chuan, Vairengte leh Sairang inkar kawngpui four lane-a siam tura zângnadawmna pek turah thil dik tâwk lo a awma an hriat thu an sawi chhuak. Land Revenue & Settlement (LRS) minister Lalruatkima erawh chuan, zângnadawmna chungchangah LRS department a inrawlh loh thu a sawi.

Lalruatkima chuan Vanlalhlana zawhna chhangin, Vairengte-Sairang kawngpui four lane-a siam turah zângnadawmna la turin competent authority-in dan ang thlapa a pek pass neih a ngaih thu a sawi a, "Zângnadawmna hi process kal lai mek a nih avangin zângnadawmna la tur zat hriat a la ni lo," a ti.

Vanlalhlana chuan, zângnadawmna la tur chu tihfel vek tawh, gazetted-ah pawh chuang tawh a nih thu sawiin, "Siamṭhat a ngai tih a ni a, tute emaw lut tur duh loh vang pawh a ni mai thei," a ti a, zângnadawmna dawng tur chu harsa taka siam thar a nih thu a sawi.

LRS Minister chuan, zângnadawmna buaipui turin NHIDCL-in competent authority for land acquisition (CALA) an ruat thu sawiin, "CALA hian preliminary notification an tichhuak a, NHIDCL lamin a sáng lutuk tiin, keini lamah an lo thlen a, ennawn leh tura tih a ni. Portal-ah upload tawh ni mah se, final a la ni lo," a ti.

Lalduhoma chuan, zângnadawmna dawng tur thun belh tumna a awm nia sawiin, "Thun belh duh lotu zawng zawngte chu LRS Secretary hoin transfer vek an ni," a ti a, pass eng emaw zat siam belh a nih thu a sawi.

LRS Secretary leh surveyor-te transfer chu an department mawhphurhna a nih loh thu sawiin LRS Minister chuan, "Anni ho transfer khawihtu chu DPAR an ni. Transfer chungchang hi Deputy Chief Minister hnenah ka thlen lo hrim hrim," a ti.

PWD changtu House leader Zoramthanga chuan, Vairengte-Sairang four lane turah fel lo lai a la awm thu sawiin, "NHIDCL chuan Mualkhang aṭanga kawng hluiah Tlawng lui kamah Sairang lam panin siam an tum a ni. Hei hi ṭha kan ti lo a, tuna kawng awm sa pawh leimin leh thil dang vangin enkawl hleih theih a ni lo," a ti a, nasa taka laih belh a nih chuan a mual muala tawlh pawh a awm theih tur thu a sawi.

Chief Minister chuan, Mual­khang ram, a tlang lama kawng sial thar chu Mizoram sorkar duh dan a nih thu sawiin, "NHIDCL lam chuan Tlawng lui kama kal tur hian an recommend a, Ministry of Road Transport & Highways minister Nitin Gadkari chuan NHIDCL duh dan ang hian tih a nih tur thu min hrilh a, nasa takin ka lo object a ni," a ti.

NHIDCL duh dan anga siam a nih a, lei tawlh avanga buaina a awm leh chuan ṭhangtharte dem an hlawh tur thu sawiin Zoramthanga chuan, "MoRTH lamin an ngaihtuah mek. Leimin bakah hian rél kawng a hnaih lutuk bakah, gas bottling plant pawh a buai vek dawn," a ti a; Mizoram sorkar duh dan anga tih a nih chuan kawng awm sa bakah, kawng ṭha zawk a awm belh thei dawn niin a sawi.