Mipui bum sim turin MNF sorkar chah

Zoram Peoples' Movement (ZPM) Ṭhalai chuan nimin khan thuchhuah siamin, MNF sorkar flagship programme - Socio-Economic Development Policy (SEDP)-ah cheng nuai 3-in hmun a chan loh thu leh, MNF chu dâwta mipui bum an chin sim tura an duh thu an tarlang. 

ZPM ṭhalaite chuan, Mizoram sorkar sum harsat thu Finance Commissioner-in November 16-a a sawi chhuak chu lawmawm an tih thu sawiin, "Kan tlin chuan SEDP-ah cheng vbc. 1,000 aia tam kan dah nghal ang' titute'n cheng vbc. 750 chauh an dah aṭang khan suma MNF sorkar pachhiatzia leh sum enkawl kawnga an khawrzia te, SEDP chu inbumna mai a nihziate a pholang chiang hle," an ti a; cheng nuai 3 beiseitu mipui an khawngaih thu an sawi.

ZPM Ṭhalai tarlan danin, SEDP-a sum dah zat chu June 13, 2019-a Assembly session-ah a chiang. Inthlan dáwnah cheng vbc. 1,000 aia tlem lo SEDP-a dah an intiam laiin, vbc. 750 an dah. District thar pathum tan cheng vbc. 8.55, doctor leh nurse post ruak hnawhkhah nan vbc. 50, zirtirtu lâk thar atan vbc. 30, kawng siam nan vbc. 150 , health care scheme atan vbc. 20, skill development atan vbc. 5, infiamna hmun thuam ṭhat nan vbc. 10-te an pawh hnuah, normal fund vbc. 300 chiah a chuang tawh a ni.

Cheng vbc. 300 chu chhungkaw pakhatin Rs. 3,00,000-a an insem dawn chuan mi 10,000 chiahin an chang thei dawn nia sawiin ZPM ṭhalaite chuan, "Vbc. 66 chu 'other priority' atan hman tura sawi a nih bawk avangin, cheng nuai 3 aia tlem lo dawn lam reng reng a lang lo," an ti.

ZPM Ṭhalai chuan, MNF party chu dâwta mipui bum an chìn chu sim tawh turin an ngen a, "Dâwt hmanga rorelna a tlo ngai lo a, tih theih loh tur thu tiam hi ro an rèlsak leh roreltu dinhmuna hlángkáitu mipui hmuhsitna a ni," an ti a; dâwt dang an sawi leh hmaa mipuia ngaihdam dil turin MNF sorkar chu thuràwn an pe a ni.