2022-23-ah thingtlang khaw tinah JJM kalpui hman tum a ni - Dy CM

PHE changtu deputy chief minister Tawnluia chuan, thingtlang khaw tinte'n tui thianghlim an dawn theihna tura hmalakna Jal Jeevan Mission (JJM) chu kum 2022-23 chhungin Mizorama thingtlang khaw tinah kalpui tum a nih thu House a hrilh.

MNF member Dr K Pachhunga zawhna kal zelah Tawnluia chuan, JJM chuan thingtlang khaw tin a huam vek thu a sawi a, "Kum 2020-21 khan khaw 100 leh tlemah kalpuina tur tender chhuah tawh a ni a, chhannate enfel mek a ni. Heta tel lo zawngah hian kum 2022-23 chhungin JJM hi kalpui a ni ang," a ti.

Dy Chief Minister chuan, Mizoramah tuihnâ a tlem tawh thu sawiin, "Gravitation (lei hîpna) hmanga tui lâk a harsa tawh a, chuvangin solar pumping kan uar a ngai," a ti a, Mizorama khaw 34-ah solar pump siam a nih tawh thu a sawi.

MNF member Lawm­awma Tochhawng zawh­na chhangin Tawnluia chuan, "Lunglei district-ah tui hnianghnâr zawk a awm theih nan sorkarin JJM hnuaiah kum 2019 aṭanga tun thlengin khaw 24-a in tinah tui thianghlim pek vek a ni a, hna thawh mekna khaw 47 a awm," a ti.