Chapchar Kût hmang dawn

Vawiin hi Chapchar Kût a ni a, hripui léng avangin tih ṭhin dan pangngai angin hman a ni dawn lo a, TV lama en theih turin hun hman a ni dawn. Kût thupui chu 'Zo nun ze mawi' tih a ni.

Chapchar Kût hi Aizawl­ah chuan Vanapa Hall-ah hman a ni dawn a, chief minister Zoram­thanga chu kût pa a ni ang a, Art & Culture minister R Lalzirliana chu kût thlengtu a ni ang. Synod moderator Rev.Dr Vanlalnghaka Ralte-in hunserh a hmang ang a, kût pa leh kût thlengtute'n thu an sawi dawn bakah, Central YMA president R Lalngheta pawhin thu a sawi dawn a ni.

Vanapa Hall-a Chap­char Kût hman hi TV leh Youtube-ah live-a pek chhuah a ni dawn a, Vanapa Hall-a hun hman zawh veleh virtual programme hman tur niin, Kût puala video buatsaih hnam làm, zai leh thil dangte tihchhuah nghal a ni ang.

Chapchar Kût pualin Governor Dr Hari Babu Kambhampati chuan thuchah tichhuakin, Mizoram mipuite kût chibai a bûk a, Zo nun mawi tivul zel turin Mizo mipui a sáwm.

Governor chuan, Covid-19 léng vangin duh angin Chapchar Kût hman theih a ni lo tih sawiin, mahni awmna ṭheuhah a remchan dan anga hlim taka hmang turin mipui a chah a, "He hunah hian kan Zo nun mawi - tlawmngaihna, rinawmna leh aia upa zahna kawngah infuih tawn ṭheuh a, kan Zo nun mawi tivul chhunzawmtu ni ṭheuh turin kan inchah nawn a ni," a ti.

Larsap chuan, Mizo khawtlang nunah mi dangte nena inrem taka awm tumna te, mi dang ṭanpui duhna leh remna leh muanna a awm theihna atana tih tur hriat kawngah mi dangte entawn tur a tam hle nia a hmuh thu a tarlang bawk.