KHAWTHLIR
Thisen pe
AVBD, Hnahthial Branch chuan nimin khan Chapchar Kût pualin Hnahthial Electric Veng community hall-ah thisen pek rûnpui an huaihawt a, Civil Hospital, Lunglei tan mipa 42 leh hmeichhia pahnihte'n thisen unit 44 an pe. ṬKP, Maranatha Unit, Lawngtlai pawhin an din champha pualin nimin khan an kohhran hall-ah District Hospital tan thisen unit 26 an pe a, petute mipa 22 leh hmeichhia paruk an ni.
La pawmpui lo
Higher & Technical Education minister Dr R Lalthangliana chuan MNF member Dr Vanlalṭanpuia zawhna chhangin, sorkar laipui aṭangin Mizoram University Southern Campus dinna tur DPR pawmpuina hmuh a la nih loh thu House a hrilh.
Lirthei tlân dan
Dinthar leh Tennis Court inkar kawng zauh hna thawhah Aizawl Traffic SP chuan, Tennis Court - Dinthar lam kal turte chu Temple-Vaivakawn kawnga kal tur leh, Dinthar kâwn aṭanga Tennis Court kal turte chu a pangngaia kal tur a nih thu a tarlang.