College zirtirtu indaih lohna a nasa - Dr R Lalthangliana

Higher & Technical Education (HTE) minister Dr R Lalthangliana chuan, tun dinhmunah college-ah zirtirtu indaih lohna a nasat thu leh college zirtirtu post ruak 173 a awm thu nimin khan House a hrilh.

ZPM member Dr Vanlalthlana zawhna chhangin HTE Minister chuan, “RUSA hnuaia thawkte dinhmunah central lam an muang lutuk a, ziak leh ṭawngka pawhin kan innawr reng,” a ti a; RUSA a tàwp a nih chuan Mizoram sorkar hnuaia an thawh zui dan tur ngaihtuah ngei a ṭul thu a sawi.

Dr R Lalthangliana chuan, college zirtirtu post ruak 173 a awm thu sawiin, “Zirtirtu indaih lohna a nasa khawp mai. Nikum vel aṭangin pension rûnpui a thleng a, mitthi kan nei nen, post ruak a tam a ni. MLA fund hmanga zirtirtu ruaite pawh kan la chhâwk thei lo,” a ti.

INC member Zodintluanga Ralte-i’n HTE department hnuaia contract assistant professor thawk mek mi 52-te March-June 2021 inkar aṭanga dah ngheh (regularisation) hun tawhte dah ngheh an nih hun tur a zawhna chhangin HTE Minister chuan, “Austerity measure hlih a nih hunah regularise tura hmalak a ni ang,” a ti a; sorkarin austerity measures (inrenchemna) an kalpui tur chin ngaihchàn mek a nih thu a sawi.