MP-in Telecommunication pisa a tlawh

Lok Sabha MP C Lalrosanga chuan Khatlaa Department of Telecomunication (DoT) pisa chu March 2, Nilaini khan a tlawh a; signal awm ṭhat lohna Mizoram ramri dep hmun hrang hranga chêngte tan chak zawka ṭan lâk a ṭul thu a sawi.

Telecom hotute chuan, mobile signal awm lohna khuate’n signal an neih theihna turin Comprehensive Telecom Development Project (CTDP) an kalpui mek thu sawiin, “Signal awm lohna khua 252-te’n signal an neih theih nan mobile tower thar 227 bun belh turin hmalak mek a ni a, Universal Service Obligation Fund aṭangin cheng vbc. 196.08 senna tur hna thawk turin Bharti Hexacom-te December 8, 2012 khan agreement kan ziahpui tawh,” an ti.

CTDP hmangin mobile tower 214 din a nih tawh thu leh khaw 232-in signal an neih tawh thu te, khaw 161 atan Mizoram sorkar nen ṭang dunin hma an lak mek thute an sawi a; BharatNet Project hmangin khaw 41 chu optical fiber cable (OFC)-a thlun zawm a nih thu te, khaw 417 tan satellite terminal bun a nih tawh thu leh chu’ngte chu hman thuai a nih theih nan Mizoram sorkarin chak zawkin hma la se an duh thu an sawi bawk.