Kut hnathawktute harsatna sawiho

Nimin khan Agriculture minister C Lalrinsanga hoin kum 2019-20 leh 2020-21 chhunga Agricultural Technology Management Agency (ATMA) hnathawh, an hmalakna leh hmachhawp thlirho a ni. Kut hnathawktute'n district hrang hranga harsatna an tawhte ATMA hmanga sutkian dan tur an sawiho nghal.

C Lalrinsanga chuan, Mizorama loneitu tam ber chu tlang ram lo nei mi an nih avangin, ATMA leh KVK kaltlanga loneitute an zirtirnaah pawh tlang ram lo nei mite chhawr ṭangkai theih tur zawn a pawimawh thu a sawi a, "ATMA hnuaia thawktute'n kut hnathawktute hmakhua ngai taka thawk a, kan hlawh lak nan maia kan hnate hmang lo a, kan thawh chhan ber kut hnathawktute tana theihtawp chhuah a ṭul," a ti.

ATMA hi district level-a Agriculture kaihhnawih department Horticulture, AH&Vety, Fisheries, Sericulture, Soil & Water Conservation sector huam chhunga kut hnathawktute zirtirna pe tura din a ni a; Ministry of Agriculture & Farmers Welfare chuan CSS 'Support to State Extension Programmes for Extension Reforms (SSEPERS)' chu ATMA hmanga kalpui tura tih a ni.

Agriculture leh a kaihhnawih zirna-in leh research hmunpui - ICAR leh KVK-te thil hmuh chhuahte chu ATMA kaltlangin kut hnathawktute hnenah thlen leh chhawp chhuah a ni ṭhin.