India rama Covid-19 hluarna ber Mizoram
March 2, Nilaini khan Mizoramah Covid-19 vei mi 680 hmuh chhuah a ni a, positive hmuh tawh zat 2,16,036 chu mihring awm zat aṭanga chhutin 19.69% niin, India ram state zingah a sáng ber. Nimin khan hripui vei dam tawh mi 1,099 chhuahtir an ni.
Mizoramah Covid-19 positive 2,16,036 hmuh chhuah tawh chu kum 2011 chhiarpuia mihring awm zat aṭangin 19.69% a tling a, India rama state 28 zingah positive percentage a sanna ber a ni. A dawttu Kerala-ah 19.47% leh Goa-ah 16.80% a ni thung.
Covid-19 vei Nilainia hmuh tharte chu mipa 333 leh hmeichhia 347 an ni a; RT-PCR hmanga hmuh 34, TrueNAT hmanga hmuh 53, RAT hmanga hmuh 586 leh FIA hmanga hmuh pasarih an ni.
March 2-a swab sample endikna district 11 zingah positivity rate 10% aia hniam district pahnih - Kolasib leh Aizawl district-te an awm a, district dang zawng 10% chung lam niin, 20% aia sang district pasarih a la awm.
Chhingchhip khuaah positive 51 hmuh chhuah thar a ni a, Phaizau khuaah mi 40 hmuh chhuah a ni bawk a; thingtlang lama hmuh tamnate an ni.
Nimin khan hripui vei dam tawh mi 1,099 chhuahtir an ni a, district tina chhuak zat chu - Aizawlah mi 345, Serchhipah 168, Lungleiah 132, Kolasib-ah 100, Khawzawlah 89, Mamitah 85, Saitualah 68, Hnahthialah 48, Champhaiah 41 leh Lawngtlaiah mi 23 a ni.
IDSP record angin, Mizoramah Covid-19 vei 2,16,036 hmuh chhuah a ni tawh a, mipa 1,00,987 leh hmeichhia 1,15,049 an ni a, mipa aiin hmeichhia 14,062-in an tam zawk. Nimin tlai dar 5 thleng khan mi 2,10,462 (97.42%) chhuahtir an ni tawh a, mi 660 (0.31%) thi tawhin, enkawl mek mi 4,914 (2.27%) an awm.
Kum 2011 chhiarpui aṭanga chhûtin, Mizorama Covid-19 vei hmuh tawh 2,16,036 chu mi 1,000 zelah hripui vei mi 197 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.
Mizoramah March 1, 2022 thlenga swab sample endik tawh 18,41,372 aṭanga positivity rate chu 11.73% a ni a; RT-PCR hmanga endik zat percentage chu 20.16 a ni a, RAT hmanga endik zat chu 74.17% a tling.