Traffic warden-te certifcate hlan

Aizawl Traffic Police hnuaia traffic warden hna thawk tura training chhuak mi 27 hnenah nimin khan Aizawl SP Conference Hall-ah certifcate hlan a ni a, Traffic SP H Ramthlengliana'n a hmanpui.

H Ramthlengliana chuan, traffic warden atana lak tharte chu an hnathawhna kawng hrang hrangah hawihhâwm leh rinawm taka mipui tana thawk turin a chah a, "Felfai taka mahni invawngin, rintlak nih tur. State páwn leh a bik takin foreign aṭanga zin mi lo kalte hian traffic police-te hi min biakràwn hmasak berte zinga mi kan nih ṭhin avangin, ram leh hnam hmelhmang tilangtu kan ni tih hria a, mi dang ṭanpuina kawngah kan theihna sang ber hlan i tum ang u," a ti.

Traffic warden-te hi traffic police-te puitu tur an ni a, mamawhna chi hrang hrang - inkhawmpui, inneih, lungphun leh puipunna hrang hrangah ruai duh tan Traffic SP kaltlanga rawih theih an ni.