Chhiah khawn chhunzawm dawn

Land Revenue & Settlement (LRS) minister Lalruatkima hoin nimin khan a pisaah LRS department hotute leh Aizawl City Local Council Association (ACLCA) hruaitute'n Covid-19 inkhuahkhirhna vanga Land Revenue chhiah leh Zoram Chhiah khawn dan tur an sawiho a; chhiah khawn hun pawhsei an rél.

Ṭhutkhawma tarlan danin, thingtlang khaw ṭhenkhat leh Aizawl veng ṭhenkhatah hripui avangin chhiah khawn a khaihlak ṭhin a, arrear tax leh fine-te lâk a, hriatthiamna nei chungin a khawn hun pawhsei a ni chungin chhiah a lut ṭha lo. State sorkarin LRS department chhiah hmuh tur a bituk hmuh tlin a la ni lo.

Meeting chuan, Mizoram pum huapa Land Revenue chhiah leh Zoram Chhiah khawn hun pawhsei leh ni se, tiin a rél a; Covid-19 SOP zâwm chunga chhiah khawn chhunzawm ni se, December 7, 2020 aṭanga khawn chhunzawm a nih theih nan Aizawl district leh AMC area-a LC leh VC-te puihna nena chhiah khawn chhunzawm ni se, an ti. Mipui pawh chhiah ṭha taka pe tura ngen ni se, an ti bawk.