KHAWTHLIR

Pachhunga University College NSS Unit chuan nimin khan an college seminar hall-ah thisen pek rûnpui an huaihawt a, Civil Hospital, Aizawl tan thisen unit 80 pein, a petute mipa 75 leh hmeichhia panga an ni.

Kolasib District Magistrate chuan thupek chhuahin, Kolasib district-ah Krismas leh kumthar vuakvêtah hâlpuah, hâlmawi leh puak thei thil reng reng lâk luh, zawrh, hralh leh hâl/hman a khap. Thupek hi thla hnih chhung atan a ni.

Aizawl South-I bialtu MLA C Lalsawivunga chuan nimin khan a bial chhunga College Veng Primary School hnenah tui tihthianghlimna leh dah vawhna (cooler) a pe. MLA chuan, zirna chu Mizoram hmasawnna hnuk a nih thu sawiin, zirtirtute chu ṭan la sauh sauh turin a fuih a; central/civil service-a inziak tling tura beiseiawmte puih a inhuam a, chutiang mi a bialah an awm chuan bengvàr turin a sàwm a ni.

Covid-19 vanga containment zone-a puan mek Dinthar venga chhungkaw khawsak harsa 675-te puihna atan nimin khan Chief Minister's Relief Fund aṭangin chhawmdawlna tur sum Rs. 6,75,000 pek chhuah a ni. Pawisa hi chhungkaw pakhatah Rs. 1,000 zela pek tur a ni a; Aizawl DC chu pawisa sem buaipui tura tih a ni.

Serchhip bawrhsap Kumar Abishek chuan Serchhip Press Club-a dah turin nimin khan MJA, Serchhip District hnenah computer a pe. Serchhip MJA chuan an Bawrhsap chungah an lawm tak zet thu an tarlang.

State Referral Hospital-ah Covid-19 vei mi 42 enkawl mek an ni a, an zinga pakhat chu nimina dah luh a ni. An zingah kum 60 chin chung lam mi 17 an awm. SRH-ZMC Bulletin tarlan danin, mi 42 zinga pahnih chu ICU-ah an awm a, pakhatin ventilator a mamawh a, pakhat zawk pawh oxygen pek a ni. Nimina chhuahtir mi pali zingah kum 92 mi a tel.