Hnam Hnatlang neih a ni ; ECI-in Delhi-ah CEO an ko thla

NGO Coordination Committee (Joint NGO) chuan Mizoram chief electoral officer (CEO) SB Shashank Mizoram aṭanga sawn chhuah phût nan leh Mizoram aṭanga chhuak Bru-te an awmna Tripura relief camp-a vote thlaktir loh phût nan nimin khan Aizawl leh khaw hrang hrangah Hnam Hnatlang neih a ni a; Mamitah chuan total bandh an huai hawt. Election Commission of India (ECI) chuan chief electoral officer (CEO) chu Delhi-a chhuk thla turin nizan khan an ko.

Aizawla Hnam Hnatlangah hian mi 25,000 aṭanga 30,000 inkar vel an tela ngaih a ni a; pawl hrang hrang hruaitute'n thu an sawi bakah, Rev. Lalsangbera kaihhruaiin ṭawngṭai rualna hun hman a ni. Zaithiamte an zai a, hnam hla sakho a ni bawk a; chhun dar 1 velah hun titawp a ni.

Joint NGO chairman Vanlalruata, Central YMA president chuan, Election Commission of India (ECI) chuan Mizoram leh Mizo mipui chu a en hrang bik nia a lan thu sawiin, "Khaw dang sial hmuhin min hmu ta mai em ni aw tih a ngaihtuah theih. ECI hi Tuikuk Commission tih maai ka chak ṭhin," a ti.

Vanlalruata chuan, Mizote ṭan rual zel a ngaih thu sawiin, "Ṭan rual hi chakna a ni a ni tih i hre thar ila, i ṭang rual ang u. Kan ṭhanharh a tul tak zet a ti a; ECI aṭanga nimina Mizoram rawn thlithlai turte nen an inkâwm ang a, chu chuan awmzia a nei lo a nih chuan che chhuak leh tura inring turin Mizo mipui a chah.

July 3, 2018-a New Delhi-a Union Home minister Rajnath Singh-a hriatpuia Ministry of Home Affairs, Mizoram sorkar Tripura sorkar leh Mizoram Bru Displaced People Forum (MBDPF) inremna chu Bru-te'n an bawhchhiat thu sawiin Vanlalruata chuan, "September 2018 thleng hun pek an ni a, an lo lêt duh lo. September a ral hnuah chhawmdawlna pek loh tur tih ni mah se, September a ral a, sorkar laipuiin ṭanpuina an la pe reng tho," a ti.

Sorkar laipui chuan Mizote chu 'Anni chu an ṭha em a, i palzût mai mai ang u' an ti ni hiala a hriat thu sawiin CYMA President chuan, "India hian lo hria se, ram leilung fa kan nihna hi min hriat sak rawh se. India mi-ah min chhiar ve ta lo em ni ti anga an ECI an chet chuan kan hotute'n a chhan dan an hre ve ang," a ti a; Mizote'n kum tam tak Bru-te laka an dawh tawhna chu hriatthiampui turin sorkar laipui a phût.

Joint NGO Chairman chuan, Mizo sakhua Kristianna suat duhtute'n Bru-te chu an ram­thim­ah an ngai ta em ni tih tur khawpin an duh­sak thu sawiin, "Pathianin kan hnam hi a ral a phal ka ring lo, kan inlungrualna i tichak zel ang u. Kan inthlan turah pawh, bial ṭhenkhatah party sawi loin common candidate i siam u, tih a ngai ta hi a lungchhiatthlak hle a ni," a ti.

Joint NGO secretary leh CYMA general secretary Lalhmachhuana chuan, kum 2014-a Lok Sabha inthlan dawn, April 7, 2014-a ECI-in Bru-te Mizoram pawna vote thlaktir tawh lo tura ziaka an intiamna chu tihlawhtling turin ECI an phût tih sawiin, "Tuikukte hi Mizoram páwnah vote kan thlaktir tur a ni lo a, an awmna polling station-ah ṭheuh vote an thlak tur a ni," a ti a; an thil phût chu ngaih pawimawh an phût tlat thu a sawi.

Lalhmachhuana chuan, CEO SB Sha­shank-a sawn chhuah phûtna lehkha November 4, 2018-ah ECI hnenah an thlen tih sawiin, "Tuikukte thu thlen an ngaihtuah nghal thei a, kan thu thlen tun thlenga an la ngaihtuah lo hi a lungawi thlak loh hle a ni," a ti. Mizoram Civil Service Association chu SB Shashank-a thawhpui lo tura an ngen thu te, Mizoram Police Service Association-ah hnam rilru pu tura police-te an ngen thute sawiin, pawl hrang hrangte'n an ngenna an tihpuitlin avangin an lawm thu a sawi bawk.

Joint NGO Secretary sawi danin, kumina electoral roll ennawnnaah Tripura-a Bru camp-ah Bru voter 5,000 chuang an ziah luh an ni a, lehkha pawimawhte Mamit district office aṭanga a bo hnuah, September 12 aṭangin roll revision an ti nawn leh a, roll revision atana form-te chu sorkar hnathawkte'n keng loin, CEO-in MBDPF hruaitute a kentir a ni.

Vanglaini palai zawhna chhangin CEO SB Shashank chuan ECI lamin Delhi-ah an koh thu sawiin, "Mizoram CEO ka ni zel dawn em ka hre lo, ka chhuk hnuah a hriat ang chu. Chhuk tura min tih angin ka chhuk ang," a ti.

Tripura-a Bru camp-ah Mizorama vote nei mi 6,715 an awm a; chu'ngte chu Mamit district-ah 4,241, Lunglei district-ah 682 leh Kolasib district-ah 381 an ni.

Aizawla Hnam Hnatlangah hian MHIP president Saipuii, MUP president RK Thanga, MZP president L Ramdinliana Renthlei leh MSU president Vanlalliana te pawhin thu an sawi.