E.Roll-a Bru thun belh tum duh loin Mipuiin Kolasib DC pisa an vawm

Kolasib DC leh district election officer (DEO) Dr Arun T-a'n Mizoram electoral roll-ah Bru voter 600 vel thu belh a tum nia hriat vangin nimin khan tlai Kolasib mipuite DC pisa kawtah an pungkhawm a; DC building darthlalang an vawm chhe nual a, hliam tênau tuar awm mah se, DC erawh a him.

Kolasib aṭanga thu dawn danin, mipui an punkhawm tirh lam hian DC Arun T chu Kolasib Joint NGO hruaitute nen an inkâwm a, DC chuan Bru-te electoral roll-ah thun tumna chu Election Commission of India (ECI) thu a nih avangin a sût theih loh thu a sawi.

Tlai dar 5:40 velah power supply a tàwp thut a, mipui pungkhawmte chuan DC pisa building chu lungin an vawm ṭan nghal a, darthlalang eng emaw zat a chhia. Chumi hnuah DC hian Bru-te chu electoral roll-ah an thun belh loh thu leh ni 9 chhungin an chinfel tur thu ziakin a dah avang leh, kohhran hruaitute'n bán an phar avangin zan dar 6 velah mipui an ṭîn darh ṭan a ni.

Boruak a ziaawm tawh hnuah Kolasib DEO Dr Arun T intiamna lehkha ziah chu electoral roll-a Bru mi 600 vel thun tumna tihtawp leh thun tawhte paih vek (full delete) tura intiamna ni loin, ngaihtuah ṭha (reconsider) tura intiamna mai a nia hriat a nih leh avangin mipui an pungkhawm ṭha leh a; nimin tlai dar 7:00 thleng kha chuan boruak a la ziaawm thei lo a, hliam tuarte pawh an awm.