Vawiinah Hnam Hnatlang nei leh dawn

NGO Coordination Committee-in Mizoram CEO SB Shashank-a, Mizoram aṭanga sawn chhuah an phût leh Bru-te Tripura-a vote thlaktir loh an phût chungchang ngaihvena Election Commission of India (ECI)-in a rawn tirh ECI palai chu nimin khan Chief Secretary conference hall-ah thuneitute nen an ṭhukhawm. SB Shashank sawn chhuah thu-ah thutlukna an siam theih loh avangin vawiinah Hnam Hnatlang neih leh tur a ni.

ECI-in a rawn tirhte hi ECI director Nikhil Kumar leh secretary SB Joshi bakah, Jhankhand chief electoral officer Lalbiaktluanga Khiangte an ni a; Aizawl an thlen veleh nimin tlai khan CS conference room-ah meeting nei nghalin, CS Arvind Ray-a'n a kaihruai. Meeting-ah hian Joint NGO hruaitu te, MKHC hruai­tute leh FMGEW hruaitute an tel.

Meeting-ah hian ECI palaite chuan, Joint NGO-te thil duh leh phûtah anmahni thuin thutlukna an siam theih loh thu leh ECI-ah thlen leh phawt a ngaih thu an sawi a ni. ECI palaite'n thutlukna an siam theih loh avang leh, SB Shashank-a sawn chhuah a la nih loh avangin Joint NGO hruaitute chuan vawiin Nilaini hian Hnam Hnatlang an neih leh dawn thu an sawi.

Joint NGO hruaitute hi nizan khan an meeting leh nghal a, vawiina SB Shashank-a dang tura Hnam Hnatlang an koh leha an rua­hmannate erawh kan hre hman lo.

ECI palaite hnenah hian FMGEW hruaitute pawhin an thil phûtte an hrilh a ni.