KHAWTHLIR

CYLA-in thláwp
Central Young Lai Association (CYLA) chuan nimin khan thuchhuah siamin, Mizoram chief electoral officer SB Shashank sawn chhuak tur leh Tripura-a Bru-te an awmnaa vote thlaktir lo tura NGO Coordination Committee hmalakna chu an thlawp thu leh hnam hnatlang an ko chu an thlawp thu an tarlang.

DC-in kâwm
Siaha DC Zoengsanga chuan November 5, Thawhṭanni khan a pisaah kumin MLA inthlan lo awm tura an district-a nodal officer-te a kâwm a, nodal officer-te chuan an chanpual ṭheuha an hmalak tawh dan leh an hmachhawp hrang hrangte an tarlang. Siaha DC chuan, inthlanna thianghlim leh dik a awm theihna atan an district chu district dangte entawn khawpa thawkrima ṭan an lak tur thu a sawi.

Dawr khar
Mizoram Merchanat Association (MIMA) chuan nimina NGO Coordination Committee bultuma Mizoram aṭanga CEO SB Shashank sawn chhuah phûta Hnam Hnatlang an huaihawt chu an thlawp a; an thlâwpzia lantir nan MIMA member zawng zawngte chuan Hnam Hnatlang neih chhung zawng dawr an khâr a ni.

Reiek-in chhuang
Reiek Welfare Society, Aizawl chuan thuchhuah siamin, Reiek khaw pa Lalnunmawia Chuaungo, IAS chu ram leh hnam tana a inpekna leh a hnathawh tawhah an chhuan thu an tarlang a; Mizoram sorkara Home secretary hna chelh lai chief electoral officer SB Shashank-a'n Election Commission-a a hêk leh, ECI-in a sawn chhuak chu an dem thu an tarlang bawk.

DEO-in ngen
Aizawl DC Dr A Muthamma, district election officer ni bawk chuan ngenna siamin, "November 28-a Mizoram inthlanpui awm turah kum dang ang bawka inthlanna muanawm leh felfai taka kan neih theih nan thuthar thehdarhtute'n mipui tichiai lo leh boruak ṭha lo thlen thei zawnga thuchhuah siam lo tura fimkhur turin kan inngen. Mipuite'n rilru fím leh thianghlim tak pu chunga vote an thlak vek theih nan theihtawp chhuah hi kan zavaia kan mawhphurhna a ni," a ti.