Khaw hrang hrangah Hnam Hnatlang

Mizoram chief electoral officer SB Shashank sawn chhuah leh Bru-te Mizoram pâwna vote thlaktir tum duh lohna lantir nan nimin khan NGO Coordination Committee bultumin Mizoram hmun hrang hrangah Hnam Hnatlang neih a ni a, Mizo mipui ṭhahnem tak an tel.

Lungleiah chuan district bawrhsap pisa bulah Hnam Hnatlang neih niin, mi ṭhahnem tak an tel a, MZP headquarters Lunglei president Lalrammuanawma'n kai­hruaiin, Rev. F Sangvela'n hunserh a hmang a; YMA, MUP, MHIP, MSU, MZP leh Chhimbial Chhantu aiawhte'n thu an sawi.

Lunglei Joint NGO secretary Ngurthansanga Sailo chuan, lungawi lohna lantir chhan ber chu SB Shashank-a'n Mizoram a la chhuahsan loh avang a nih thu sawiin, "MLA Election 2018 inbuatsaihna chu engti kawng maha kalpui chhunzawm a nih theih lohna turin Lunglei district chhunga constituency palite returning officer-te office leh Election office hi kan dang ta a ni," a ti.

Lungleia hnatlangte hi tlai lam dar 3-ah an ṭin darh a; mipui náwlpui ṭin mah se, SB Shashank sawn chhuah a nih hma chuan Lunglei District Election Officer pisa chu dan an tum a ni.

Champhaiah chuan District Election Officer (DEO), DC ni bawk pisa tualah Hnam Hnatlang neih a ni a, mi ṭhahnem tak pung khawmin, Mizoram CEO SB Shashank-a lim/thlalak an hâl.

Kolasib-ah pawh District Election Officer (DEO) pisa kawtah mipui ṭhahnem tak an pung khawm a; SB Shashank-a sawn chhuah an phût thu leh Mizoram páwnah Bru-te vote thlaktir an duh loh thuin an au rual a ni. Serchhipah chuan IOC Venga DEO/DC pisa pêngah an pungkhawm thung.

Mamitah chuan Joint NGO bultumin total bandh huaihawt a ni. Bandh hi mipuiin an thlawp ṭha hle a, zirna-inte leh sorkar pisate khar vek a nih bakah, sumdawnna hmunte pawh khâr a ni.

Tlabungah pawh zing dar 8:30 aṭangin Tlabung SDO(C) pisa kawtah mipui an pung khawm a, mi ṭhahnem tak an tel a; inthlan leh a kaihhnawih hna dang buaipuitu Tlabunga SDO(C) pisaa thawkte pisa kai tur an dang. Tlabung Zodin Branch YMA adviser PC Lian­nghinglova chuan, ram leh hnam chhan kawngah ṭhahnemngai leh zuala ṭan lak a ṭulzia sawiin, Tlabunga Mizo mipuite chu hnam chhan turin mawhphurhna sang tan an neih thu leh Mizo hnam tana inpe zual zel turin a sáwm a ni.

Hnam Hnatlang hi district khawpui bakah, khaw dang eng emaw zatah huaihawt a ni bawk a; Kawrtethawvengah te, West Phaileng khuaahte pawh neih niin, mi ṭhahnem tak an pung khawm.