ZPM-in Chakma candidate dawn lo tih sawi nawn

Zoram Peoples' Movement (ZPM) chuan thuchhuah siamin, November 28-a Mizoram Assembly inthlanah ZPM-in Chakma candidate an neih dawn loh thu an tarlang a; Hnam Hnatlang huaihawt leh huaihawt a nih chhan chungchangah NGO Coordination Committee hmalakna an thlawp tlat thu an tarlang bawk.

Joint NGO-in Hnam Hnatlang a koh hial ngaia Mizo hnam leh ram, sakhuana thlenga ngaihtuahawm khawpa derthawng chu pawi an tih thu sawiin ZPM chuan, "Duat taka kan enkawl, hnam tlem zawk leh ram leilung fate ni loin Central sorkarah Mizote min hêk a, thu dik finfiah tum loa mualpho thei ang ber Mizote beih kan ni fo hi a thinrimthlak hle a ni," an ti.

ZPM chuan, SB Shashank, Mizoram aṭanga chhuak tura an nawrna chu an thlawp thu sawiin, "India sorkar hian Mizote min hmusita min thamlotu rawn dah nawn leh ngai tawh lo se," an ti a; Election Commission of India chu Joint NGO leh all political party-te nena inremna a lo siam tawh palzût lo turin an phût tih an sawi.

Bru-te chu Mizote an thah vanga Tripura-a tlanchhia an nih thu sawiin ZPM chuan, sorkar laipui, Mizoram sorkar, Tripura sorkar leh Bru pawlte inremna siam palzûta Bru-te Mizoram páwna vote thlaktir tumna chu ṭha an tih loh thu an sawi a, "An vote neihna hmun poling station ṭheuhah chauh vote thlaktir ni se. Dik lo taka roll revision kalpui a, Election official-te hriatpuina ni miah loa roll-a thunte pawh ennawn leh a nih loh chuan hman zui ni lo se kan duh," an ti.

Home secretary aṭanga sawn chhuah tâk Lalnunmawia Chuaungo chu a rang thei ang berin a post ngaiah ngei let an phût thu sawiin ZPM chuan, "ZPM hi Pathian leh mipui zarah a sorkar a nih chuan Pu Lalnunmawia Chuaungo la let leh turin theihtawp a chhuah dawn a ni," an ti a; Mizorama DC, SP leh secretary post pawimawhah a theih chen chenah Mizo ngei dah ni se an duh thu an tarlang.

Nimina Hnam Hnatlanga MZP president L Ramdinliana thu sawi, 'NGO Coordination Committee-in party tinte Chakma candidate nei lo tura a ngenna party zawng zawngin an bawhchhe vek' tia a sawi chu thu dik a nih thu sawiin ZPM chuan, "ZPM hi party ni loin, movement a ni a, ZPM-in Chakma candidate a dah ve lo tih hi Mizoram mipuite hriatah kan han puang nawn leh a ni," an ti.