Common candidate chungchangah Hachhek NGO hruaitute Aizawlah

Hachhek Constituency All NGO Coordination Committee (HCANCC) hruaitute chuan nimin khan Aizawl an thleng a, Hachhek bialah Mizo tan candidate inṭâwm (common candidate) neih chung­changah political party hruaitute an kâwm dawn.

HCANCC-te chuan Thawhṭanni khan an constitueny-a Bru candidate an awm chuan common candidate neih an lo rel a tawh a; an thurel chung­chang hi Thawhṭanni zan khan an biala political party-te an sawipui nghal. Political party-te chuan, HCANCC thutlukna chu pawm mah se, hruaitu nei an nih angin, an headquarters-a an hruaitute râwn phawt turin an ti a ni.

Common candidate chungchang bawhzui tur hian HCANCC hruaitute chu nimin khan Aizawlah an rawn kal a, vawiin hian political party hruaitute an kâwm ang.

Hetih lai hian, HCANCC chuan common candidate tur an la ti fel lo a, political party-te ráwn chhunga bial mipui leh candidate atana political party-te'n an lo ruat tawhte pawhin an pawm theih ngei candidate siam an tum thu HCANCC hruaitute chuan Vanglaini an hrilh.

Candidate atan Bru dah an nih loh chuan HCANCC chuan common candidate neih kher ṭul an ti lo tih an sawi bawk.